រាជធានីភ្នំពេញ ៖ អនុរដ្ឋលេខាធិការក្រសួងការពារជាតិ លោក ស ថាវី និងបក្ខពួក ត្រូវបានតុលាការចោទប្រកាន់ពាក់ព័ន្ធនឹងការបញ្ហាលក់ដីមិនមែនជារបស់ខ្លួន នៅសង្កាត់សំរោង ខណ្ឌព្រែកព្នៅ រាជធានីភ្នំពេញ ហើយនៅព្រឹកថ្ងៃទី២៩ ខែមិថុនា ឆ្នាំ២០២០នេះ លោក ស ថាវី បានចូលខ្លួនតាមដីកាបង្គាប់របស់តំណាងអយ្យការដើម្បីសាកសួរ ។
បើតាមដីការបស់តំណាងអយ្យការអមសាលាដំបូងរាជធានីភ្នំពេញ បានចោទប្រកាន់លោក ស ថាវី និងបក្សពួកពីបទ «ផ្តើមគំនិតក្នុងអំពើលួចលក់អចលនវត្ថុ ដែលមិនមែនជារបស់ខ្លួន»។ ចំណែកបក្ខពួកផ្សេងទៀតដែលក្នុងនោះមាន៧នាក់ ត្រូវបានគេស្គាល់ឈ្មោះ ត្រូវបានចោទប្រកាន់ពីបទលួចលក់អចលនវត្ថុដែលមិនមែនជារបស់ខ្លួន ។
ដីការបស់ព្រះរាជអាជ្ញា សយ ណូរ៉ា បានសម្រេចចោទប្រកាន់បើកការស៊ើបសួរលើមនុស្សចំនួនដូចខាងក្រោម ៖
ទី១- លោក ស ថាវី អាយុ៥៣ឆ្នាំ (ក្រៅឃុំ)
ទី២- លោក ឡុង ដារ៉ា ហៅ ណាង (ឃុំខ្លួន)
ទី៣- លោក ប៉ូច ថេន អាយុ៥២ឆ្នាំ (ឃុំខ្លួន)
ទី៤- លោក ឡូញ រស់ អាយុ៤០ឆ្នាំ (ឃុំខ្លួន)
ទី៥- លោក អ៊ុក ភក្តី កើតឆ្នាំ១៩៦៦ (ក្រៅឃុំ)
ទី៦- លោក យិន អ៉ិម (ក្រៅឃុំ)
ទី៧- លោក ម៉ាត់ ឌី អាយុ៥០ឆ្នាំ (ក្រៅឃុំ)
ទី៨- លោកស្រី យស់ ម៉ាលីណា (ក្រៅឃុំ)
ទី៩- និង គូកន (ក្រៅឃុំ)។
ក្នុងសំណុំរឿងនេះ ក្រៅពីលោក ស ថាវី ដែលមុនចូលកាន់តំណែងជាអនុរដ្ឋលេខាធិការក្រសួងការពារជាតិ ជាអតីតអភិបាលខេត្តព្រះវិហារ និង ឧត្តរមានជ័យនោះ តុលាការក៍បានចេញដីកាបង្គាប់ឲ្យសមត្ថកិច្ច តាមចាប់ខ្លួនមនុស្ស២នាក់ទៀត ផងដែរ ៕
