ខេត្តកណ្ដាល ៖ ស្ត្រីម្នាក់បើករថយន្តស៊េរីទំនើប១គ្រឿងតាមបណ្តោយផ្លូវ៦០ម៉ែត្របោះពួយយ៉ាងលឿនវ៉ាជែងរថយន្តដឹកខ្យាច់១គ្រឿងទៀតបណ្តាលឱ្យជ្រុលចង្កូតក្រឡាប់ធ្លាក់ចូលទឹកបឹងបណ្តាលឱ្យស្លាប់ ។ ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង១២ និង១០នាទីយប់រំលងអធ្រាត្រឈានចូលថ្ងៃទី២៨ ខែមិថុនា ឆ្នាំ២០២០ ស្ថិតតាមបណ្តោយផ្លូវ៦០ម៉ែត្រ សង្កាត់ដើមមាន ក្រុងតាខ្មៅ ។
ស្ត្រីរងគ្រោះមានឈ្មោះ ចាន់ ស្រីល័ក្ខ អាយុ៣០ឆ្នាំ មុខរបរមេផ្ទះ ស្នាក់នៅបុរី លឹម ឈាងហាក់ ចំការដូង ស្ថិតក្នុងខណ្ឌដង្កោ រាជធានីភ្នំពេញ ដោយបើកបររថយន្តទំនើប១គ្រឿងម៉ាកតូយូតា កាមរីហាយប្រ៊ីដ ពណ៌ស ពាក់ផ្លាកលេខ ភ្នំពេញ 2BG-7274 ។
យោងតាមប្រភពពីសាក្សីដែលបានឃើញហេតុការណ៍បានឱ្យដឹងថា មុនពេលកើតហេតុគេឃើញស្ត្រីខាងលើបើករថយន្តធ្វើដំណើរតាមបណ្តោយផ្លូវ៦០ម៉ែត្រក្នុងទិសដៅពីជើងទៅត្បូងក្នុងល្បឿនលឿនដូចហោះដលយឡាយវីដេអូបណ្តើរបើកបររថយន្តបណ្តើរ ។
លុះពេលមកដល់ចំណុចកើតហេតុបានវ៉ារថយន្តមួយគ្រឿងបណ្ដាលឱ្យរ៉េចង្កូតមកខាងឆ្វេងធ្លាក់ផ្លូវក្រឡាប់អូសជាច្រើនម៉ែត្រ ធ្លាក់ចូលទឹកបឹងកំប្លោកលិចបាត់តែម្ដង ។ ក្រោយកើតហេតុសមត្ថកិច្ច និងប្រជាពលរដ្ឋបានចុះរាវរកសពស្ត្រីរូបនោះយកចេញពីក្នុងរថយន្តទៅដាក់លើគោក រង់ចាំសាច់ញាតិដឹកយកទៅតម្កល់ទុកនៅវត្តឬស្សីសាញ់ធ្វើបុណ្យតាមប្រពៃណី ៕