រាជធានីភ្នំពេញ ៖ បើគ្មានអ្វីប្រែប្រួលទេ ប្រជាពលរដ្ឋខ្មែរនៅម៉ាឡេស៊ី ដែលជានិស្សិត និងពលករចំនួន១៥៨នាក់ទៀត នឹងធ្វើមាតុភូមិនិវត្តន៍ នៅថ្ងៃស្អែកនេះ ទី២៦ ខែមិថុនា ដោយមានការសហការ និងជួយសម្របសម្រួល ពីស្ថានទូតកម្ពុជាប្រចាំប្រទេសម៉ាឡេស៊ី ។
បើតាមការបញ្ជាក់របស់ឯកឧត្តម កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៥ ខែមិថុនា ឆ្នាំ២០២០ បានឲ្យដឹងថា ពលរដ្ឋខ្មែរទាំង១៥៨នាក់នោះ នឹងចាកចេញពីទីក្រុងគូឡាឡាំពួរ នៅថ្ងៃទី២៦ ខែមិថុនា ឆ្នាំ២០២០ វេលាម៉ោង០៩៖០០នាទីព្រឹក ហើយមកដល់រាជធានីភ្នំពេញ នៅវេលាម៉ោង០៩៖៥០នាទីព្រឹក ថ្ងៃដដែល ។ តាមជើងហោះហើរនោះ ក៏មានអ្នកដំណើរជនជាតិម៉ាឡេស៊ី ២នាក់ផងដែរ ក្នុងជើងហោះហើរលេខ MH754 របស់ក្រុមហ៊ុនអាកាសចរណ៍ម៉ាឡេស៊ី ៕