ខេត្តកោះកុង៖ អនុគណៈកម្មការទទួលបន្ទុកសាងសង់ស្តូបអនុស្សាវរីយ៍នយោបាយឈ្នះខេត្តកោះកុង អំពាវនាវទៅកាន់មជ្ឈដ្ឋានទូទៅ រាប់តាំងពីប្រជាជន មន្ត្រីរាជការ កងប្រដាប់អាវុធ ពាណិជ្ជករ រហូតដល់អ្នកមានទ្រព្យច្រើន…ឲ្យចូលរួមឧបត្ថម្ភថវិកាតាមលទ្ធភាព ដើម្បីជម្រុញការពន្លឿនការសាងសង់ស្តូបឈ្នះ ឈ្នះ ឱ្យកាន់តែមានការរីកចម្រើនតាមផែនការគ្រោងទុក៕
តាមរយៈសេចក្តីអំពាវនាវរបស់ខ្លួន អនុគណៈកម្មការទទួលបន្ទុកសាងសង់ស្តូបអនុស្សាវរីយ៍នយោបាយឈ្នះឈ្នះខេត្តកោះកុង បង្ហាញជំនឿយ៉ាងមុតមាំថា សាធារណជន នឹងចូលរួមគាំទ្រ ដល់ការសាងសង់សំណង់ប្រវត្តិសាស្ត្រជាតិមួយនេះ។ អនុគណៈកម្មការទទួលបន្ទុកសាងសង់ស្តូបអនុស្សាវរីយ៍នយោបាយឈ្នះខេត្តកោះកុង ប្រាប់សាធារណជន ឲ្យទាក់ទងទៅការិយារបស់ សម្តេច ទៀ បាញ់ រដ្ឋមន្ត្រីការពារជាតិ បើមានសមានចិត្តចង់បរិច្ចាគថវិកា។
ក្នុងការសាងសង់ស្តូបអនុស្សាវរីយ៍នយោបាយឈ្នះ-ឈ្នះនេះ មានទីតាំងស្ថិតនៅទល់មុខអាស្រមលោកយាយម៉ៅ ភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ តាមបណ្តោយផ្លូវជាតិលេខ៤៨។
ស្តូបអនុស្សាវរីយ៍នយោបាយឈ្នះ-ឈ្នះ សាងសង់ឡើងតាមគំរូប្លង់គោល មានឃឿន ៤ ជ្រុង សរុប ៦៦ ម៉ែត្រ កម្ពស់ ៤៣ ម៉ែត្រ ហើយទីធ្លា បរិវេណស្តូបអនុស្សាយ៍នយោបាយឈ្នះ ឈ្នះ មានទំហំធំទូលាយ ក្នុងការចតរថយន្ត និងការទេសចរណ៍កម្សាន្តរបស់ពលរដ្ឋ ៕