ម៉ាឡេស៊ី ដោយសារតែវីរុសកូវីដ១៩រាតត្បាត ធ្វើឲ្យប្រទេសនេះ បានអនុវត្ដវិធានការបិទក្នុងស្ថានភាពគ្រាអាសន្ន ដោយកំណត់ឲ្យប្រជាជនស្នាក់នៅក្នុងផ្ទះ និងកន្លែងអាជីវកម្មមួយចំនួន ក៏ត្រូវបានផ្អាក ចាប់តាំងពីថ្ងៃទី១៨ ខែមីនា ឆ្នាំ២០២០ ។
រយៈពេលបិទជិត ២ខែ កម្លងមកនេះ ថ្មីៗនេះនៅបណ្ដាញសង្គមហ្វេសប៊ុក បានចែករំលែកនូវរូបភាពជាច្រើនសន្លឹក ចេញពីហាងមួយកន្លែង ដែលមានទីតាំងស្ថិតនៅរដ្ឋ Sabah បង្ហាញឲ្យឃើញពី កាបូប ស្បែកជើង និងខ្សែក្រវ៉ាត់ ដែលសុទ្ធសឹងតែដុះផ្សិតពេញ ។
យ៉ាងណាមិញ បើក្រឡេកទៅមើលកៅអី នៅក្នុងរោងកុន ក៏មិនខុសគ្នាដែរ គឺតួកៅអីទាំងស្រុង ត្រូវផ្សិតពណ៌ស ដុះពាសពេញតែម្ដង ដែលអ្នកប្រើប្រាស់បណ្ដាញសង្គមភាគច្រើន អះអាងថា រោងកុននេះមានទីតាំងស្ថិតនៅទីក្រុង Ipoh នៃរដ្ឋ Perak ។
ចំពោះផ្សិតទាំងនេះដែរ អាចបង្កគ្រោះថ្នាក់យ៉ាងធ្ងន់ធ្ងរដល់សុខភាព ប្រសិនបើគ្មានការសម្អាតឲ្យបានត្រឹមត្រូវជាមុននោះទេ ។ ផ្សិតអាចបង្កបញ្ហាដល់ប្រព័ន្ធផ្លូវដង្ហើម ក៏ដូចជារលាកស្បែក ច្រមុះ បំពង់ក និងសួតជាដើម ។ លើសពីនេះទៀត វានឹងបង្កជាកណ្ដាស់ ហៀរសំបោរ ភ្នែកឡើងក្រហម និងកន្ទួលស្បែក ហើយជាពិសេសវានឹងវាយប្រហារខ្លាំងទៅលើអ្នកកើតជំងឺហឺតតែម្ដង ៕