រាជធានីភ្នំពេញ ៖ នាយរងផ្នែកប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ឈ្មោះ កែវ រដ្ឋវិទ្យា អាយុ២៩ឆ្នាំ ត្រូវបានសមត្ថកិច្ចនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ ចាប់ខ្លួនបានហើយ កាលពីរសៀលថ្ងៃម្សិលមិញនេះ នៅខេត្តកំពត ខណៈបក្ខពួក២នាក់ទៀត កំពុងរត់គេចខ្លួន ។
បើតាមចម្លើយសារភាពរបស់ជនសង្ស័យឈ្មោះ កែវ រដ្ឋវិទ្យា ជាប៉ូលិសការិយាល័យប្រឆាំងគ្រឿងញៀននៃស្នងការដ្ឋាននគរបាលរាជធានីភ្នំពេញ បានរៀបរាប់ថា នៅថ្ងៃទី២៥ មេសា ខ្លួននិងបក្ខពួក២នាក់ទៀត បានទៅផឹកស៊ីនៅមុខ សូរិយាម៉ល រហូតដល់ម៉ោង៣ទៀបភ្លឺ ឈានចូលថ្ងៃទី២៦ មេសា ស្រាប់តែជនរងគ្រោះឈ្មោះ ណែម ហឿង ភេទប្រុស អាយុ៤០ឆ្នាំ ជាមុខសញ្ញាជួញដូរគ្រឿងញៀន បានមកសួរខ្លួនថា «ត្រូវការទិញគ្រឿងញៀនដែរឬទេ»? ។ ភ្លាមនោះ ពួកខ្លួនក៏មានគោលបំណងចង់ចាប់មុខសញ្ញាជួញដូរគ្រឿងញៀននោះ ហើយក៏យល់ព្រមទិញគ្រឿងញៀន១កញ្ចប់ តម្លៃ៣០ដុល្លារ ។
ជនសង្ស័យ កែវ រដ្ឋវិទ្យា សារភាពបន្តថា ក្រោយពីបានទទួលគ្រឿងញៀន១កញ្ចប់ ពីឈ្មោះ ហែម ហឿង រួចហើយ ពួកខ្លួនក៏រកលេសថា គ្រឿងញៀននេះមិនគ្រប់ទេ រួចក៏អោយយកថ្នាំញៀនទៅវិញ និង យកថែម១កញ្ចប់ទៀត ។ ពេលយកថ្នាំញៀនទៅវិញ គឺ មិនឃើញឈ្មោះ ណែម ហឿង ត្រឡប់មកវិញទេ ពួកខ្លួនក៏ទៅតាមហើយអោយសហការជាមួយ ដើម្បីហៅអ្នកលក់ថ្នាំញៀនមកវិញ តែឈ្មោះ ណែម ហឿង មិនព្រមសហការដោយព្យាយាមគេចវេស ។ ឃើញដូច្នោះ បក្ខពួកខ្លួនបានចូលទៅចាប់ឈ្មោះ ណែម ហឿង ហើយខ្លួនក៏ដកកាំភ្លើងអាវុធខ្លីម៉ាក K54 ចេញពីកាបូបស្ពាយភ្ជង់ទៅលើឈ្មោះ ណែម ហឿង ដោយមិនបានប្រយ័ត្នក៏ផ្ទុះចំជនរងគ្រោះ ពីគូទធ្លាយដល់ប្លោកនោម តែម្តង ។
ទោះជាយ៉ាងណា បច្ចុប្បន្ន ជនរងគ្រោះកំពុងសង្គ្រោះបន្ទាន់នៅមន្ទីរពេទ្យកាល់ម៉ែត នៅឡើយទេ ។
សូមរម្លឹកថា តាមចាប់ខ្លួនមន្ត្រីនគរបាលដែលបាញ់បុរសម្នាក់ នៅខណ្ឌដូនពេញ រួចរត់គេចទៅខេត្តកំពត ៕
