រាជធានីភ្នំពេញ ៖ គណៈសង្ឃនាយក ទាំង២គណៈ សម្តេចព្រះមហាសង្ឃរាជ ទេព វង្ស និងសម្តេចព្រះសង្ឃនាយក នន្ទ ង៉ែត បានចេញលិខិតមួយច្បាប់ “លេខពិសេស” សូមចម្រើនពរជូន ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ស្តីពីការណែនាំដល់សាស្ត្រាចារ្យ ឡុង សារិន បង្រៀននៅក្រុមហ៊ុន E-School Cambodia ដែលការបង្រៀនអក្សរសាស្ត្រខ្មែរ របស់សាស្ត្រាចារ្យរូបនេះ ធ្វើឲ្យប៉ះពាល់ដល់តម្លៃព្រះសង្ឃគណៈមហានិកាយយ៉ាងធ្ងន់ធ្ងរ ។
យោងតាមលិខិតរបស់គណៈសង្ឃនាយក ចុះថ្ងៃទី២៨ មេសា ២០២០ បានដឹងថា សាស្ត្រាចារ្យឡុ ង សារិន បានបង្រៀនតាមអនឡាញដល់សិស្សានុសិស្ស ត្រង់ចំណុចប្រៀបធៀបរវាង ព្រះសង្ឃគណៈមហានិកាយ និងព្រះសង្ឃគណៈធម្មយុត្តិកនិកាយ ដោយក្នុងនោះបង្ហាញពីការបន្តុះបង្អាប់ដល់បាតាល និងលើកម្ខាងដល់កំពូល ដែលផ្ទុយទៅនឹងភាពពិតជាក់ស្ដែងនាពេលបច្ចុប្បន្ន ។ ឧទាហរណ៍គាត់លើកឡើងថា ព្រះសង្ឃគណៈធម្មយុត្តិកនិកាយប្រព្រឹត្តវិន័យតឹងរ៉ឹង ដូចលោកធុតង្គ មិនកាន់លុយ ទោះក្នុងសម័យគេមានលុយក៏ដោយ មិនប្រើទូរស័ព្ទ និងមិនពាក់ស្បែកជើងជាដើម ហើយប្រើសម្ដីឡកឡឺយបន្តុះបង្អាប់ នឹងដាក់បន្ទាបព្រះសង្ឃគណៈមហានិកាយស្មើដោយបព្វជិត គ្មានវិន័យ ប្រព្រឹត្តធូររលុង ប្រាសចាកធម៌វិន័យរបស់ខ្លួន ហាក់ដូចជាអាក្រក់ណាស់ ពិបាកនឹងគោរព ។ ការណ៍នេះ គណៈសង្ឃពុទ្ធសាសនាកម្ពុជា យល់ឃើញថាការបង្រៀនរបស់សាស្ត្រាចារ្យរូបនេះ ត្រង់ចំណុចប្រៀបធៀបព្រះសង្ឃទាំងពីរគណៈគ្មានមូលដ្ឋានពិតជា ខ្វះសុចរិតភាព ខ្វះការស្រាវជ្រាវស៊ីជម្រៅ គ្មានវិជ្ជាជីវៈ ជាគ្រូបង្រៀន គ្មានយុត្តិធម៌ គ្មានសច្ចធម៌ការសន្និដ្ឋានខុសស្ថានភាពពិត ផ្ទុយនឹងគោលការណ៍របស់រាជរដ្ឋាភិបាល ស្ដីពីសុខដុមនីយកម្មសាសនា ដែលគណៈសង្ឃមហានិកាយពុំអាចទទួលយកបានឡើយ ។ សួរថា តើក្នុងប្រទេសកម្ពុជា នាពេលបច្ចុប្បន្ននេះ មានវត្តណាមួយ ដែលព្រះសង្ឃធម្មយុត្តិ មិនកាន់លុយមិនប្រើទូរស័ព្ទ និងមិនពាក់ស្បែកជើងនោះ ? ម្យ៉ាងទៀតការបង្រៀនប្រកបដោយកំហុសឆ្គងនេះ ពិតជាជះឥទ្ធិពលយ៉ាងខ្លាំងដល់ផ្នត់ គំនិតយុវជនគ្រប់ជំនាន់ និងពុទ្ធបរិស័ទ ទូទៅ ដែលធ្វើឲ្យមានការយល់ច្រឡំ និងអាចមានការរើសអើងលើព្រះសង្ឃគណៈមហានិកាយទៀតផង ។
ជុំវិញករណីនេះ ក្រសួងអប់រំ យុវជន និងកីឡា នៅព្រឹកថ្ងៃទី២៩ មេសានេះ បានចេញលិខិត ករណីសំណើសុំធ្វើការណែនាំដល់សាស្ត្រាចារ្យ ឡុង សារិន បង្រៀននៅក្រុមហ៊ុន E-School Cambodia ។
ក្រសួងអប់រំ យុវជន និងកីឡា បញ្ជាក់ថា លោកគ្រូ ឡុង សារិន គឺជាសាស្ត្រាចារ្យចូលនិវត្តន៍ម្នាក់ ដែលកំពុងបង្រៀននៅតាមសាលាឯកជន និងបានថតវីដេអូសម្រាប់ក្រុមហ៊ុន E-School Cambodia។ វីដេអូដែលបង្រៀនដោយលោកគ្រូ ឡុង សារិន មិនបានឆ្លងកាត់ការពិនិត្យរបស់ក្រសួងអប់រំ យុវជន និងកីឡាឡើយ ជាហេតុបង្កើតឱ្យមានអធិករណ៍ ៕
