រាជធានៅភ្នំពេញ ៖ យោងតាមហ្វេសប៊ុកផេកផ្លូវការរបស់សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា នៅថ្ងៃទី២៧ ខែមេសានេះ បានផ្ញើសារថ្លែងអំណរគុណដល់បងប្អូនពលករខ្មែរធ្វើការនិងស្នាក់នៅប្រទេសម៉ាឡេស៊ី ដែលបានយោគយល់ដល់វិធានការទប់ស្កាត់ជំងឺឆ្លងកូវីដ-១៩នៅកម្ពុជា នាពេលកន្លងមក ពេលនេះសម្តេចតេជោ សម្រេចឲ្យពលករខ្មែរជាង២០០នាក់នេះអាចវិលត្រឡប់មកកម្ពុជាវិញបាន ឆាប់ៗនេះ ។
ប្រមុខរាជរដ្ឋាភិបាលកម្ពុជា បានសរសេរសារតាមហ្វេសបុកផ្លូវការថា មកទល់ថ្ងៃនេះកម្ពុជា និងពិភពលោកកំពុងសកម្មនាំគ្នាប្រយុទ្ធប្រឆាំងនឹងជំងឺឆ្លងកូវីដ-១៩ ។ ហើយមកទល់ពេលនេះពិភពលោក ក៏មិនទាន់រកឃើញថ្នាំព្យាបាលជំងឺកូវីដ-១៩ ដ៏កាចសាហាវនេះនៅឡើយទេ ។
សម្តេចបានបន្តថា «រាជរដ្ឋាភិបាលកម្ពុជាសូមអរគុណកូនក្មួយពលករជាង២០០នាក់ ដែលក្នុងនោះក៏មានកូនក្មួយអ្នកទោសចំនួន ៧៣នាក់ផងដែរ ដែលត្រូវបានផ្អាកការធ្វើដំណើរវិលត្រឡប់មកកម្ពុជាកាលពីពេលថ្មីៗក្នុងពេលដែលដែលប្រទេសយើងកំពុងដាក់បម្រាមតឹងរឹងក្នុងការធ្វើដំណើរ ។ ប៉ុន្តែនៅពេលនេះបម្រាមការធ្វើដំណើរក្នុងប្រទេសក៏បានលើក ដូច្នេះរាជរដ្ឋាភិបាលកម្ពុជាបានសម្រេចអោយកូនក្មួយពលករខ្មែរជាង២០០នាក់អាចវិលត្រឡប់មក កាន់មាតុប្រទេសវិញ ។ ប៉ុន្តែសូមកូនក្មួយទុកពេលវេលាអោយខាងអាជ្ញាធរម៉ាឡេស៊ីគេធ្វើតេស្តសុខភាពសិន ដើម្បីបញ្ជាក់ថា កូនក្មួយគ្មានសញ្ញាវិជ្ជមាន នៃជំងឺកូវីដ-១៩ ។ យើងទាំងអស់គ្នាទាំងអ្នកនៅក្នុងប្រទេស និងក្រៅប្រទេស គឺត្រូវមានការប្រុងប្រយ័ត្នជានិច្ច កុំនាំរោគឆ្លងពីក្រៅចូលក្នុងនិងពីម្នាក់ទៅម្នាក់ ព្រោះជំងឺកូវីដ-១៩ នេះ គឺងាយឆ្លងខ្លាំងណាស់» ។
សម្តេចតេជោ បានបន្តទៀតថា «សូមឲ្យកូនក្មួយទាំងអស់កុំបារម្ភអ្វី ប្រសិនបើកូនក្មួយគ្មានជំងឺឆ្លងកូវីដ ១៩ទេគឺកូនក្មួយអាចវិលត្រឡប់មកកម្ពុជាវិញបានក្នុងពេលឆាប់ៗនេះ ។ ផ្ទុយពីនេះបើខាងម៉ាឡេស៊ីពិនិត្យឃើញមានកូវីដ-១៩ ទៅលើកូនក្មួយណា គឺត្រូវនៅសម្រាកព្យាបាលនៅទីនោះសិន រហូតដល់ជាសះស្បើយទើបអនុញ្ញាឱ្យត្រឡប់ មកកម្ពុជាវិញ ។ ចំពោះកូនក្មួយដែលនឹងមកដល់កម្ពុជាវិញ គឺត្រូវធ្វើចត្តាឡីស័ក១៤ថ្ងៃ(រស់នៅដាច់ដោយឡែក)សិន ដើម្បីតាមដានសុខភាពជាបន្ត ហើយក៏មានការធ្វើចត្តាឡីស័ក១៤ថ្ងៃទៀត នៅតាមផ្ទះផងដែរ» ។
គួររំលឹកជូនថាកាលពីថ្ងៃទី៧ ខែមេសា ឆ្នាំ២០២០សម្តេចនាយករដ្ឋមន្ត្រី ហ៊ុន សែន បានហាមឃាត់មិនឱ្យពលរដ្ឋខ្មែរដែលកំពុងធ្វើការនៅប្រទេសម៉ាឡេស៊ីដែលចង់វិលត្រឡប់មកកម្ពុជាវិញក្នុងឱកាសបុណ្យចូលឆ្នាំខ្មែរដោយបារម្ភខ្លាចមានការនាំជំងឺកូវីដ១៩ ចូលមកក្នុងប្រទេស ៕