រាជធានីភ្នំពេញ ៖ រដ្ឋាភិបាលសហរដ្ឋអាមេរិក បានផ្តល់មូលនិធិគិតជាទឹកប្រាក់ចំនួន ១,៥ លានដុល្លារ បន្ថែមទៀតសម្រាប់ជួយកម្ពុជា ក្នុងការប្រយុទ្ធប្រឆាំងនឹងជំងឺកូវីដ១៩ ចាប់តាំងពីពេលចាប់ផ្តើមនៃការផ្ទុះមេរោគរាតត្បាតនេះមក រដ្ឋាភិបាលសហរដ្ឋអាមេរិក បានផ្តល់ជំនួយសរុបចំនួនជាង ៣,៥ លានដុល្លារ ដល់កម្ពុជា ។
បើតាមលោកឯកអគ្គរដ្ឋទូតសហរដ្ឋអាមេរិក W. Patrick Murphy បានមានប្រសាសន៍ថា «ជំនួយនេះ ជួយដល់ការឆ្លើយតបរបស់ប្រទេសកម្ពុជា ចំពោះជំងឺកូវីដ១៩ បន្តកិច្ចសហប្រតិបត្តិការ និងភាពជាដៃគូដ៏យូរអង្វែងរបស់យើងលើ ផ្នែកសុខាភិបាលជាមួយប្រទេសកម្ពុជា ។ ការយកឈ្នះលើមេរោគកូវីដ១៩បាន គឺជាបញ្ហាប្រឈមជាសាកលមួយ ហើយសហរដ្ឋអាមេរិក កំពុងធ្វើការនៅក្នុងស្រុក និងនៅបរទេស ដើម្បីបញ្ឈប់ការរាលដាលនៃជំងឺនេះ ។ ជំនួយរបស់យើងនឹងជួយប្រព័ន្ធសុខាភិបាលកម្ពុជា នៅក្នុងការតាមដានជំងឺព្យាបាលអ្នកឈឺ ហើយការពារកុំឲ្យមានឆ្លងជំងឺកូវីដ ១៩ ថែមទៀត» ។
លោកបន្តថា «រាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក មានប្រវត្តិដ៏យូរក្នុងការធ្វើការរួមគ្នា ជាដៃគូប្រកបដោយផលិតភាព និងប្រសិទ្ធភាព ក្នុងការពង្រឹងនូវប្រព័ន្ធសុខាភិបាល ដោះស្រាយនូវជំងឺឆ្លងផ្សេងៗ និងលើកកម្ពស់សមិទ្ធផលសុខាភិបាល សម្រាប់ប្រជាជនកម្ពុជា នៅក្នុងតំបន់ និងលើពិភពលោក» ។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ថ្លែងថា ជំនួយដែលសហរដ្ឋអាមេរិកផ្តល់ដល់កម្ពុជា ជាផ្នែកមួយជួយកម្ពុជាឱ្យទាន់ពេលវេលា ដើម្បីទប់ស្កាត់ជំងឺកូវីដ១៩ ឱ្យមានប្រសិទ្ធភាពខ្ពស់។
រដ្ឋមន្ត្រីក្រសួងសុខាភិបាលថ្លែងថា «សហរដ្ឋអាមេរិកផ្តល់ជំនួយដ៏សំខាន់ រួមគ្នាដើម្បីពង្រឹងប្រព័ន្ធសុខាភិបាលកម្ពុជា ពង្រឹងសមត្ថភាពធនធានមនុស្សដែលយើងមានស្រាប់ ដូច្នេះ ជាមូលដ្ឋានសំខាន់ ដើម្បីឱ្យប្រព័ន្ធសុខាភិបាលយើងអាចមានកម្លាំងគ្រប់គ្រាន់ និងទទួលបានឧបករណ៍ ជំនួយស្មារតី និងកិច្ចសហប្រតិបត្តិការបន្ថែម ដើម្បីឆ្លើយតបមានប្រសិទ្ធភាព ក្នុងការទប់ស្កាត់វីរុសកូវីដ១៩នេះ» ។
សូមជម្រាបថានៅក្នុងប្រទេសកម្ពុជា ស្ថានទូតអាមេរិកផ្តល់ជំនួយផ្នែកសុខាភិបាលតាមរយៈក្រុមអន្តរទីភ្នាក់ងារ ដែលរួមមានទីភ្នាក់ងារផ្តល់ជំនួយអាមេរិក (USAID) មជ្ឈមណ្ឌលគ្រប់គ្រងនិងបង្ការជំងឺ(USCDC) វិទ្យាស្ថានជាតិសុខភាព(NIH)អង្គភាពស្រាវជ្រាវសុខាភិបាលនៃកងទ័ពជើងទឹកសហរដ្ឋអាមេរិក(NAMRU-2)ក្រសួងការបរទេសអាមេរិកនិងអង្គការដទៃទៀត។ ជំនួយអាមេរិក លើផ្នែកសុខាភិបាលក្នុងប្រទេសកម្ពុជា នៅក្នុងការប្រយុទ្ធប្រឆាំងនឹងមេរោគអេដស៍ ជំងឺគ្រុនចាញ់ ជំងឺរបេង លើកកម្ពស់សុខភាពមាតានិងទារក ហើយពង្រឹងប្រព័ន្ធសុខាភិបាលជារួម៕