រាជធានីភ្នំពេញ ៖ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន បានប្រកាសដកអាជ្ញាបណ្ណ័ ចំពោះបណ្តាញសារព័ត៌មានណា មិនស្តាប់ការណែនាំ ដើម្បីកុំអោយប៉ះពាល់ដល់សារព័ត៌មាន ដែលគេគោរពវិជ្ជាជីវៈត្រឹមត្រូវ ។
ការប្រកាសរបស់ ឯកឧត្តម ខៀវ កាញារីទ្ធ បែបនេះធ្វើឡើងនៅក្នុងកិច្ចថ្នាក់ដឹកនាំក្រសួងព័ត៌មាន នាព្រឹកថ្ងៃទី២៧ ខែមេសា ឆ្នាំ២០២០ ។
រដ្ឋមន្ត្រីក្រសួងព័ត៌មាន ប្រសាសន៍បន្ថែមថា ពាក់ពន្ធ័ទៅនឹងបញ្ហានៃការិះគន់ពីសាធារណជន ចំពោះបណ្តាញសារព័ត៌មាន ពិសេសព័ត៌មានអនឡាញមួយចំនួន ដែលបានផ្សាយហួសពីវិជ្ជាជីវៈ អគ្គនាយកដ្ឋានព័ត៌មាន និងសោតទស្សន៏ ត្រូវពិនិត្យពីអាជ្ញាបណ្ណ័ និងកិច្ចសន្យានានា របស់ សារព័ត៌មាននោះ ដើម្បីមានវិធានការច្បាស់លាស់ បើនៅតែមិនស្តាប់ការណែនាំ ត្រូវដកអាជ្ញាបណ្ណ័តែម្តង កុំអោយមានការផ្សាយទៀត ដើម្បីកុំអោយមានការប៉ះពាល់ ដល់សារព័ត៌មាន ដែលគេគោរពវិជ្ជាជីវៈត្រឹមត្រូវ ។
ជាមួយគ្នានេះដែរ ឯកឧត្តមបញ្ជាក់ថា ត្រូវពិនិត្យ និងណែនាំដល់ស្ថាប័នអង្គភាពសារព័ត៌មានទាំងអស់ ដែលក្រសួងព័ត៌មានបានចេញអាជ្ញាបណ្ណ័ អោយ និងមិនត្រូវដាក់រូបសញ្ញាសម្គាល់ (ឡូហ្គោ) របស់ក្រសួងព័ត៌មាន នៅលើកាត សម្គាល់ខ្លួនបុគ្គលិក ដែលខ្លួនចេញអោយនោះទេ ដើម្បីកុំអោយមានការយល់ច្រឡំមកលើក្រសួងព័ត៌មាន ។
ជាមួយគ្នានេះ អង្គភាពសារព័ត៌មាន ត្រូវរាយការណ៏មកក្រសួងព័ត៌មាន អំពីចំនួនបុគ្គលិករបស់ខ្លួន ដែលបានប្រចាំការនៅកន្លែងណាខ្លះ កុំអោយមានភាពរញ៉េររញ៉ៃ ហើយគ្មានការទទួលខុសត្រូវ នៅពេលមានបញ្ហាអ្វីកើតឡើង ៕
