រាជធានីភ្នំពេញ ៖ នៅព្រឹកថ្ងៃទី២៧ មេសា ២០២០ នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម បានប្រាប់អ្នកសារព័ត៌មានអោយដឹងថា កងទ័ពមួកខៀវកម្ពុជាចំនួន៣រូប ដែលឆ្លង កូវីដ១៩ នៅក្នុងតំបន់បេសកកម្ម នៃប្រទេសម៉ាលី មានសុខភាពល្អប្រសើរទេ ក្រោមការយកចិត្តទុកដាក់ពីក្រុមគ្រូពេទ្យរបស់ប្រទេសម៉ាលី ក៏ដូចជាក្រុមគ្រូពេទ្យជំនាញ នៃអង្គការសហប្រជាជាតិ ដែលមានវត្តមាននៅទីនោះ។
នាយឧត្តមសេនីយ៍ សែម សុវណ្ណនី បានបន្តថា ដោយឡែកកងទ័ពខៀវចំនួន១១នាក់ផ្សេងទៀត ដែលធ្លាប់មានប្រវត្តិទាកទងផ្ទាល់ជាមួយកងទ័ពទាំង៣នាក់ ត្រូវបានក្រុមគ្រូពេទ្យជំនាញ ឱ្យស្នាក់នៅដាច់ដោយឡែក ដើម្បីតាមដានអាការសុខភាព ក៏ប៉ុន្តែ រហូតមកដល់ថ្ងៃនេះ សុខភាពរបស់ពលទាហានទាំង១១នាក់នោះ មានសុខភាពល្អធម្មតា គឺមិនមានលេចចេញរោគសញ្ញាណាមួយពាក់ព័ន្ធ នឹងវីរុស កូវីដ១៩ នោះទេ ។
សូមជម្រាបថា កងទ័ពមួកខៀវកម្ពុជា ៣នាក់ ឆ្លងកូវីដ-១៩ នៅប្រទេសម៉ាលី
ឧត្តមសេនីយ៍ឯក ផល សាម៉ន អ្នកនាំពាក្យមជ្ឈមណ្ឌលជាតិគ្រប់គ្រងកងតម្លាំងរក្សាសន្តិភាព បានថ្លែងប្រាប់អ្នកសារព័ត៌មាន នៅព្រឹកថ្ងៃទី២៤ មេសានេះថា ពេលនេះ អង្គការសហប្រជាជាតិ ហៅកាត់ UN និងក្រសួងការពារជាតិកម្ពុជា បាននិងកំពុងតាមដាន និងបញ្ជូនកងទ័ពមួកខៀវកម្ពុជា មកសម្រាកព្យាបាល ដោយយកចិត្តទុកដាក់បំផុត នៅក្នុងមន្ទីរពេទ្យ បាមាកូ ប្រទេសម៉ាលី ។ ក្នុងនោះ មានប្រុស២នាក់ ស្រី១នាក់ គឺពិនិត្យរកឃើញ វិជ្ជមាន កូវីដ១៩ ៕