រាជធានីភ្នំពេញ ៖ ជាមួយនឹងវិធានការ មិនឲ្យអ្នកដំណើរទាំងអស់ នៅលើកប៉ាល់ Viking Cruise Journey ចុះចេញមកលើគោក នៅឯទីរួមខេត្តកំពង់ចាម បន្ទាប់ពីរកឃើញស្ត្រីជនជាតិអង់គ្លេសម្នាក់ អាយុ៦៥ឆ្នាំ មានឆ្លងវីរុសកូវីដ-១៩ នោះ ក្រុមមន្ត្រីជំនាញរបស់ក្រសួងសុខាភិបាល កំពុងយកសំណាកវត្ថុវិភាគរបស់អ្នកដំណើរ និងបុគ្គលិកបម្រើការ សរុបទាំងអស់ចំនួន៦៤នាក់ មកពិនិត្យនិងធ្វើតេស្ត នៅវិទ្យាស្ថានប៉ាស្ទ័រកម្ពុជា នៅថ្ងៃពុធនេះ ។
កាលពីម៉ោង៧យប់ថ្ងៃទី១០ មីនា ២០២០នេះ ក្រសួងសុខាភិបាល ចេញសេចក្តីព័ត៌មានប្រកាសផ្លូវការ និងលម្អិតអំពីករណីរកឃើញស្ត្រីជនជាតិអង់គ្លេស អាយុ៦៥ឆ្នាំ មានផ្ទុកមេរោគ Covid-19 ដែលចូលមកខេត្តកំពង់ចាម តាមនាវាទេសចរណ៍មកពីប្រទេសវៀតណាម ។
សេចក្តីប្រកាសព័ត៌មាន បានរៀបរាប់ឲ្យដឹងថា នៅរសៀលម៉ោង៤និង៣០នាទី ថ្ងៃទី១០ ខែមីនា ឆ្នាំ២០២០នេះ លទ្ធផលពីវិទ្យាស្ថានប៉ាស័រកម្ពុជា បានបញ្ជាក់ថា ស្ត្រីជនជាតិអង់គ្លេសម្នាក់ អាយុ៦៥ឆ្នាំ មានវិជ្ជមានវីរុស Covid-19 ។
ស្ត្រីមានវីរុស Covid-19 នេះ បានធ្វើដំណើរតាមយន្តហោះ ចេញពីទីក្រុងឡុងនៃប្រទេសអង់គ្លេស មកដល់ទីក្រុងហាណូយ ប្រទេសវៀតណាម នៅថ្ងៃទី០២ ខែមីនា ឆ្នាំ២០២០ ដែលមានគ្នា៥នាក់ (ជនជាតិអង់គ្លេសទាំងអស់ ធ្វើតេស្តអវិជ្ជមានចំនួន៤នាក់)។ បន្ទាប់មកពួកគាត់បានបន្តដំណើរចាកចេញតាមនាវាខាលើ ពីទីក្រុងហូជីមិញសំដៅមករាជធានីភ្នំពេញ នៅថ្ងៃទី០៥ ខែមីនា ឆ្នាំ២០២០ និងបានដល់រាជធានីភ្នំពេញ នៅថ្ងៃទី០៧ ខែមីនា ឆ្នាំ២០២០។
នៅថ្ងៃដដែលមុននឹងមកដល់រាជធានីភ្នំពេញ អ្នកទទួលខុសត្រូវអ្នកទេសចរនៃនាវានេះ បានទទួលដំណឹងថា យន្តហោះដែលស្ត្រីជនជាតិអង់គ្លេសបានជិះ នៅថ្ងៃទី០២ មីនា ឆ្នាំ២០២០នោះ មានជនជាតិវៀតណាមម្នាក់ ដែលអង្គុយជិតស្ត្រីជនជាតិអង់គ្លេសអាយុ ៦៥ឆ្នាំខាងលើនេះ ត្រូវបានរកឃើញវិជ្ជមានវីរុស Covid-19 នៅទីក្រុងហាណូយ ប្រទេសវៀតណាម។
ពេលមកដល់រាជធានីភ្នំពេញ នៅថ្ងៃទី០៧ ខែមីនា ឆ្នាំ២០២០ ជនជាតិអង់គ្លេសទាំង៥រូប ត្រូវបានបញ្ជូនទៅពិនិត្យសុខភាពនៅមន្ទីរពេទ្យមិត្តភាពខ្មែរ សូវៀត ហើយបានយកសំណាកវត្ថុវិភាគចំនួន៣នាក់ (ដោយ២នាក់ ប្រកែកមិនព្រមឲ្យយកជាដាច់ខាត ដោយគាត់សំអាងថា មិនមានបញ្ហាសុខភាព ឬរោគសញ្ញាអ្វីទាំងអស់»។ ជាលទ្ធផលអ្នកទាំង៣នាក់នេះ មានអវិជ្ជមានវីរុស Covid-19។ បន្ទាប់មកនាវាបានបន្តដំណើរទៅកាន់ខេត្តកំពង់ចាម។
ដើម្បីឲ្យមានភាពច្បាស់លាស់ មន្ទីរពេទ្យមិត្តភាពខ្មែរ-សូវៀត បានផ្តល់ព័ត៌មាន ទៅកាន់មន្ទីរសុខាភិបាលខេត្តកំពង់ចាម ដើម្បីឲ្យរង់ចាំយកវត្ថុសំណាកទាំង២នាក់ ដែលមិនទាន់ធ្វើតេស្តនោះ ដោយមានការសម្របសម្រួលពីអ្នកគ្រប់គ្រងនាវា នៅពេលចូលចតនៅចំណតនៃខេត្តកំពង់ចាម ហើយត្រូវបានក្រុមគ្រូពេទ្យពិនិត្យ និងបញ្ជូនសំណាកវត្ថុវិភាគមក វិទ្យាស្ថានប៉ាស្ទ័រកម្ពុជា នៅថ្ងៃទី០៩ ខែមីនា ឆ្នាំ២០២០។ នៅថ្ងៃទី១០ ខែមីនា ឆ្នាំ២០២០ វេលាម៉ោង៤៖៣០នាទីរសៀលនេះ ក៏ទទួលបានលទ្ធផលវិជ្ជមាន Covid-19 លើស្ត្រីជនជាតិអង់គ្លេសអាយុ៦៥ឆ្នាំ។
បុគ្គលដែលសង្ស័យទាំង៥រូបខាងលើនេះ ត្រូវបានឲ្យនៅក្នុងបន្ទប់ដាច់ដោយឡែកលើនាវាភ្លាមៗ ដោយមិនឲ្យចាកចេញមកលើគោក នៅរាជធានីភ្នំពេញឡើយ នៅពេលរង់ចាំលទ្ធផល ។
ក្រុមគ្រូពេទ្យក្រសួងសុខាភិបាល និង មន្ត្រីWHO កំពុងនាំយកសំណាក ករណីសង្ស័យភ្ញៀវទេសចរជនជាតិអង់គ្លេសមួយចំនួនទៀតលើនាវាទេសចរណ៍នៅខេត្តកំពង់ចាម ទៅពិនិត្យរកCovid-19 នៅព្រឹកថ្ងៃទី១១ ខែមីនា ឆ្នាំ២០២០នេះ ៕