បរទេស៖ នៅប្រទេសវៀតណាម គិតត្រឹមតែរយៈពេល២សប្ដាហ៏ប៉ុណ្ណោះ ចំនួនគ្រោះថ្នាក់ចរាចរណ៏មានការធ្លាក់ចុះយ៉ាងខ្លាំង បន្ទាប់ពីរដ្ឋាភិបាលបានអនុវត្តន៏ច្បាប់ស្ដីពីការហាមបើកបរក្នុងពេលស្រវឹង ច្បាប់នេះត្រូវបានរឹតបន្តឹងជាពិសេសចំពោះមន្រ្ដីរាជការ និងកងកម្លាំងប្រដាប់អាវុធ
លោក ឡេ ស៊ុនឌុក អនុប្រធាន នាយកដ្ឋាននគរបាលចរាចរណ៍នៃក្រសួងសន្តិសុខសាធារណៈវៀតណាម(MoPS) បានថ្លែងនៅក្នុងសន្និសីទសារព័ត៌មានមួយ ដែលរៀបចំឡើងដោយគណៈកម្មាធិការជាតិសុវត្ថិភាពចរាចរណ៍ នៅទីក្រុងហាណូយ កាលពីថ្ងៃទី១៦ខែមករា លោកបានបញ្ជាក់ថា គ្រោះថ្នាក់ចរាចរណ៍ចំនួន៣២២បានកើតឡើងនៅទូទាំងប្រទេស ចាប់ពីថ្ងៃទី១ ដល់ថ្ងៃទី១៥ខែមករា ដោយបានសម្លាប់មនុស្សចំនួន២៤៩នាក់ និងរងរបួសចំនួន១៥៨នាក់។ លោកបានបន្ទទៀតថា ចំនួនគ្រោះថ្នាក់បានធ្លាក់ចុះ៣១លើកឬ៩ភាគរយ ខណៈចំនួនអ្នកស្លាប់បានថយចុះចំនួន៣៨នាក់ឬ១៣ភាគរយ បើប្រៀបធៀបនឹង២សប្តាហ៍មុន។
យោងតាមបទប្បញ្ញត្តិថ្មីរបស់ប្រទេសវៀតណាមនេះ បានកំណត់ថាប្រសិនបើអ្នកណាម្នាក់បានបើកបរក្រោមឥទ្ធិពលនៃគ្រឿងស្រវឹងជននោះត្រូវព្យួរប័ណ្ណបើកបរ២២ខែ ទៅ២៤ខែ និងផាកពិន័យទឹកប្រាក់១.២៩៧ដុល្លារ។ ច្បាប់នេះត្រូវបានអនុវត្តន៏ចាប់តាំងពីដើមខែមករាមកម្លេះ ហើយក្នុងនោះដែលប៉ូលីសចរាចរណ៏វៀតណាម បានផាកពិន័យអ្នកបើកបរចំនួន៦.២៧៩នាក់ និងប្រមូលប្រាក់បានជាង២១ពាន់លានដុង(៩០៧.៧៥០ដុល្លារ) ។
ជាមួយគ្នានេះដែរ ច្បាប់នេះត្រូវបានរឹតបន្តឹងជាពិសេសសម្រាប់មន្ត្រីរាជការនិងកងកម្លាំងប្រដាប់អាវុធ ហើយក្នុងអំឡុងពេលពីរសប្តាហ៍កន្លងមកនេះ មិនមានគ្រោះថ្នាក់ទាក់ទងនឹងគ្រឿងស្រវឹងធ្ងន់ធ្ងរទេ ៕