រាជធានីភ្នំពេញ ៖ លោក នុត ពុធដារ៉ា អតីតអភិបាលខណ្ឌដង្កោ ត្រូវបានរាជរដ្ឋាភិបាលកម្ពុជា ចេញអនុក្រឹត្យ ចុះថ្ងៃទី០៩ ខែធ្នូ ឆ្នាំ២០១៩ តែងតាំងលោក នុត ពុធដារ៉ា ជាអភិបាលរង ខេត្តក្រចេះជាផ្លូវការ ។
សូមជម្រាបថា អភិបាលរងខណ្ឌដង្កោ ដែលជាស្ត្រីមួយរូប ត្រូវបានប្រកាសតែងតាំង ជាចៅហ្វាយខណ្ឌ ជំនួសលោក នុត ពុធដារ៉ា ជាមួយនឹងការប្រកាសតែងតាំងអភិបាលរងមួយរូបផងដែរ ។ នេះជាលើទី១ ដែលស្ត្រីត្រូវបានប្រកាសឲ្យកាន់តំណែងជាអភិបាលខណ្ឌ ក្នុងចំណោមខណ្ឌទាំង១៤ នៅក្នុងរាជធានីភ្នំពេញ ។
ពិធីប្រកាសនេះបានធ្វើឡើង កាលពីរសៀលថ្ងៃទី១៦ ធ្នូ ២០១៩នេះ នៅសាលាខណ្ឌដង្កោ ក្រោមវត្តមានលោក ឃួង ស្រេង អភិបាលរាជធានីភ្នំពេញ ។
លោកស្រី គឹម ញឹប ឋានន្តរសក្ដិវរមន្ត្រី ថ្នាក់លេខ ១ ដែលមុននេះ លោកស្រីជាអភិបាលរងខណ្ឌដង្កោ មកកាន់ មុខតំណែងជាអភិបាល នៃគណៈអភិបាលខណ្ឌដង្កោ ជំនួសលោក នុត ពុធដារ៉ា អភិបាលខណ្ឌដង្កោ និងតែងតាំងលោក ទុយ ច័ន្ទ ឋានន្តរស័ក្តិវរមន្ត្រីថ្នាក់លេខ២ ឲ្យកាន់មុខ តំណែងជាអភិបាលរងនៃគណៈអភិបាលខណ្ឌដង្កោ រាជធានីភ្នំពេញ ។ ចំណែកលោក នុត ពុធដារ៉ា នឹងត្រូវទៅកាន់តំណែងជាអភិបាលរងខេត្តក្រចេះ ៕
