រាជធានីភ្នំពេញ ៖ អ្វីដែលលោក នុត ពុធដារ៉ា ភ័យព្រួយកាលពីកន្លងមក គឺព្រួយពីតំណែងចៅហ្វាយខណ្ឌនោះ បានមកដល់ហើយ ថ្ងៃនេះ លោកស្រី គឹម ញឹប ត្រូវបានរាជរដ្ឋាភិបាលតែងតាំងជាអភិបាល នៃគណៈអភិបាលខណ្ឌដង្កោ ជំនួសលោក នុត ពុធដារ៉ា ។
ពិធីប្រកាសផ្លាស់ប្ដូរអភិបាលខណ្ឌថ្មីនេះ ត្រូវបានធ្វើឡើងនៅរសៀលថ្ងៃទី១៦ ខែធ្នូ ឆ្នាំ២០១៩នេះ ក្រោមអធិបតីលោក ឃួង ស្រេង អភិបាលរាជធានីភ្នំពេញ និងមានការចូលរួមពីអ្នកពាក់ព័ន្ធជាច្រើនទៀតផងដែរ ។
លោកស្រី គឹម ញឹប ឋានន្តរស័ក្តវរមន្ត្រី ថ្នាក់លេខ១ ដែលត្រូវបានរាជរដ្ឋាភិបាលតែងតាំង ឱ្យមកកាន់មុខតំណែង ជាអភិបាល នៃគណៈអភិបាលខណ្ឌដង្កោ រាជធានីភ្នំពេញ ជំនួសលោក នុត ពុធដារ៉ា និងមានការប្រកាសតែងតាំងអភិបាលរងខណ្ឌម្នាក់ផងដែរ គឺលោក ទុយ ច័ន្ទ ។
អ្វីដែលគេចាំមិនភ្លេចនោះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានស្តីបន្ទោសលោក នុត ពុតដារ៉ា អភិបាលខណ្ឌដង្កោ កាលពីថ្ងៃទី២៩ ខែសីហា ឆ្នាំ២០១៨នេះ នៅគ្រាដែលសម្តេច បានអញ្ជើញចុះជួបសំណេះសំណាល ជាមួយកម្មករ កម្មការិនីសរុប១៤,៧៩៩នាក់ទៀត មកពីរោងចក្រ សហគ្រាសចំនួន៦ ក្នុងនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
សម្តេចតេជោ ហ៊ុន សែន បានស្តីបន្ទោសខ្លាំងៗទៅលោក នុត ពុតដារ៉ា ចៅហ្វាយខណ្ឌដង្កោ ដែលបានផ្ញើសារទៅសម្តេចទាំងយប់ ដោយសុំបន្តដំណែងនៅកន្លែងដដែល២ឆ្នាំទៀត នៅគ្រាដែលសម្តេចមិនបានដឹងផងនោះ ។
សម្តេចតេជោ បានមានប្រសាសន៍យ៉ាងដូច្នេះថា ៖ ឯណា នុត ពុតដារ៉ា ? រួចចុះហ្អែងឡប់ស្អី ? ទាំងយប់ហ្នឹង…! បានបង្ខំអញត្រូវវ៉ៃម៉ោទាំងយប់នៀក ? ផ្ញើសារមកឯងទាំងយប់អាធ្រាត្រម៉ោង១១យប់ហើយ ចង់នៅបន្ត២ឆ្នាំទៀត…!!! អាណាចង់ដកហ្អែង…!!! បើអញមិនដឹងផង អាណាចង់ដកហ្អែង…!!! ស្ថិតនៅក្រោមក្រសួងមហាផ្ទៃមែន តែការតែងតាំងក៏ត្រូវឆ្លងអញដែរ..!!! បើប្រាប់ពេលនេះមិនទាន់បាន ចាំផ្ញើសារប្រាប់អញពេលក្រោយក៏បាន…!! ។
ជាការកត់សម្គាល់ លោក នុត ពុតដារ៉ា កាលពីនៅក្នុងតំណែងជាអភិបាលខណ្ឌនោះ លោកតែងតែខិតខំប្រឹងប្រែងធ្វើការដឹកនាំមន្ដ្រីរាជការ កងកម្លាំងប្រដាប់អាវុធ ជួបសំណេះសំណាលជាប្រចាំជាមួយប្រជាពលរដ្ឋក្នុងមូលដ្ឋាន ពិសេសការធ្វើវេទិកាសាធារណៈ ដើម្បីក្ដាប់ឲ្យបាននូវអ្វីដែលប្រជាពលរដ្ឋត្រូវការ ។ សម្រាប់ដំណាក់កាល នៃការបោះឆ្នោត ទាំងបោះឆ្នោតថ្នាក់ជាតិ និងឃុំសង្កាត់ គេសង្គេតឃើញថា សម្រាប់ខណ្ឌដង្កោ គឺគណបក្សប្រជាជនកម្ពុជា តែងតែទទួលបានសម្លេងគាំទ្រ យ៉ាងច្រើនលើសលប់ ៕
