រាជធានីភ្នំពេញ ៖ នៅក្នុងឱកាសអញ្ជើញផ្តល់កិត្តិយសប្រគល់សញ្ញាបត្រដល់និស្សិត នៃសាកលវិទ្យាល័យវិទ្យាសាស្ត្រសុខាភិបាល ចំនួន២,៥៨៨ នាក់ នៅកោះពេជ្យ កាលពីព្រឹកថ្ងៃទី១៦ ខែធ្នូ ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជូនដំណឹងដល់បងប្អូនប្រជាពលរដ្ឋ អោយបានដឹងអំពីសមត្ថភាពមន្ទីរពេទ្យព្រះកេតុមាលា (មន្ទីរពេទ្យទាហាន) ដែលអាចព្យាបាល និងដោះដូរក្រលៀន (គ្រឿងក្នុង) និងសរីរាង្គមួយចំនួនបាន ដោយមិនចាំបាច់ចំណាយថវិកាច្រើនចេញទៅព្យាបាលនៅពេទ្យក្រៅប្រទេសឡើយ ។
សម្តេចតេជោ ហ៊ុន សែន មានប្រសាសន៍ថា «កន្លងទៅ អ្នកដែលត្រូវដូរក្រលៀន អ្នកដែលត្រូវដូរនេះ ដូរនោះ អាគ្រឿងក្នុង តែងតែទៅប្រទេសក្រៅ ដោយមិនបានដឹងអំពីថា តើកម្ពុជាមានវឌ្ឍនភាពដល់ណាហើយ! ឥឡូវខ្ញុំសូមយកឱកាសនេះ ដើម្បីចែករំលែក និងជម្រាបជូនចំពោះប្រជាពលរដ្ឋកម្ពុជា ឲ្យបានជ្រាបថា ការដូរក្រលៀន ឬសរីរាង្គមួយចំនួន គឺធ្វើបាននៅក្នុងកម្ពុជារបស់យើង ដោយសុវត្ថិភាព គឺនៅក្នុងមន្ទីរពេទ្យកងទ័ពរបស់យើងតែម្តង ។ កាលពីមុន ឆ្នាំ២០១៥ កំពុងដូរក្រលៀន វាត្រូវមានមនុស្ស ដែលត្រូវយកក្រលៀនមួយ យកទៅដាក់ក្រលៀនមួយទៀត ។ ស្រាប់តែមានអ្នកប្រឆាំងការជួញដូរមនុស្ស ទៅចូល… ដល់ដឹងដល់ខ្ញុំ ខ្ញុំក៏បានប្រាប់ថា ឲ្យយកចេញ ងាប់គេ ងាប់ឯង… ព្រោះគេអត់បានដឹង ។ រឿងនេះ ជារឿងរស៊ើប ។ ប៉ុន្តែយើងក៏ត្រូវឲ្យប្រជាពលរដ្ឋរបស់យើងបានដឹងដែរ ថាឥឡូវ អ្នកដែលត្រូវដូរក្រលៀន ឬដូរសរីរាង្គខ្លះ ដែលប្រទេសគេធ្វើបាន ប្រទេសយើង ក៏ធ្វើបានដែរ ។ គឺនៅមន្ទីរពេទ្យកងទ័ព(មន្ទីរពេទ្យ ព្រះកេតុមាលា) ជិតវត្តភ្នំ» ។
សម្តេចតេជោ ហ៊ុន សែន បានបន្តថា «កន្លងទៅ អ្នកចម្រៀង ឈ្មោះ យូ ឌីស្កូ ដែលគាត់រស់បានមកដល់សព្វថ្ងៃនេះ គឺដោយសារការដែលខ្ញុំផ្តល់ថវិកាឲ្យទៅក្រៅប្រទេស ដើម្បីដូរក្រលៀន ។ ពេលនោះ ខ្ញុំក៏មិនទាន់ទាញយកគាត់ឲ្យមកដូរនៅស្រុកខ្មែរទេ ។ ប៉ុន្តែឥឡូវ ខ្ញុំគួរតែបញ្ជាក់ជូនប្រជាពលរដ្ឋរបស់យើង ។ តម្រូវការនៃការដូរក្រលៀន ។ យើងមានតម្រូវការ គ្រាន់តែថា ជាសាច់ញាត្តិរបស់យើង ដែលមានក្រលៀន មានឈាមដូចយើង គឺអាចដោះស្រាយបញ្ហាបានហើយ ។ ប៉ុន្តែនិយាយយ៉ាងដូច្នេះ មិនមែនបានន័យថា ឲ្យបងប្អូនលក់ក្រលៀនទេ! នាំគ្នាលក់ក្រលៀនទេ! ឬក៏សរីរាង្គខ្លះ ។ គេអាចដូរបានដល់សួត ប៉ុន្តែខ្ញុំមិននិយាយថា ប្រទេសណាទេ ។ ថ្លើម ក៏អាចប៉ះប៉ូវបានដែរ ។ និយាយរួម អ្វីដែលនៅក្រៅប្រទេសធ្វើបាន យើងក៏ធ្វើបានដូចគ្នា ។ ប៉ុន្តែនៅមន្ទីរពេទ្យកងទ័ព» ។
សម្តេចតេជោ ហ៊ុន សែន បន្ថែមថា «ថ្ងៃនេះ អាចប្រជាពលរដ្ឋរបស់យើង បានដឹងពីព័ត៌មាននេះ ហើយកុំអស់សង្ឃឹម ទោះបីគ្មានប្រាក់ ឲ្យតែសាច់ញាត្តិ ឬកូនចៅ មានក្រលៀន អាចមកដូរនៅកន្លែងនេះបានហើយ ព្រោះជំងឺនេះ វាមានច្រើនដែរ» ។
ទន្ទឹមនឹងនេះដែរ សម្តេចតេជោ បានហាមឃាត់ដាច់ខាត ចំពោះអំពើជួញដូរក្រលៀន និងគ្រឿងក្នុងមនុស្សដោយខុសច្បាប់ ដែលនឹងត្រូវផ្តន្ទារទោសយ៉ាងធ្ងន់ធ្ងរមិនលើកលែងឡើយ ។
សម្តេចតេជោ ក៏បានលើកទឹកចិត្ត និងជំរុញដល់ការអភិវឌ្ឍវិស័យសុខាភិបាលឲ្យកាន់តែមានគុណភាព ប្រសិទ្ធភាពខ្ពស់ ជាមួយបច្ចេកវិទ្យាទំនើបថ្មីៗ ដើម្បីអោយសក្តិសមជាកន្លែងព្យាបាលរបស់ជាតិក្នុងការបម្រើសេវាសុខភាពជូនដល់បងប្អូនប្រជាពលរដ្ឋខ្មែរ ៕
