ខេត្តព្រៃវែង ៖ បន្ទាប់ពីមានការរិះគន់ខ្លាំងលើបណ្ដាញសង្គមហ្វេសប៊ុក រយៈពេលពីរបីថ្ងៃកន្លងមកនេះ ជនសង្ស័យម្នាក់ពាក់ព័ន្ធបទល្មើសរំលោភសេពសន្ថវៈទៅលើក្មេងស្រីអនីតិជនចំនួន៥ដង នៅឃុំរក្សជ័យ ស្រុកបាភ្នំ ខេត្តព្រៃវែង ត្រូវកម្លាំងនគរបាលខេត្តព្រៃវែង សម្រេចឃាត់ខ្លួនវិញហើយ នៅថ្ងៃទី០៩ ខែធ្នូ ឆ្នាំ២០១៩ ក្រោយស្រាវជ្រាវរកបានភស្ដុតាងដាក់បន្ទុក និងតាមបញ្ជារបស់ព្រះរាជអាជ្ញាអមសាលាដំបូងខេត្ត លោក ប៊ូ ប៊ុនហាង ។
បើយោងតាមសេចក្ដីបំភ្លឺរបស់ស្នងការដ្ឋាននគរបាលខេត្តព្រៃវែង ដែលបណ្ដាញព័ត៌មានក្នុងស្រុក ទទួលបាននៅព្រឹកថ្ងៃទី១០ ធ្នូ ២០១៩នេះ បានឲ្យដឹងថា កាលនៅថ្ងៃទី០៦ ខែធ្នូ ឆ្នាំ២០១៩ ប៉ុស្តិ៍នគរបាលរដ្ឋបាលរក្សជ័យ នៃអធិការដ្ឋាននគរបាលស្រុកបាភ្នំ បានទទួលពាក្យបណ្តឹងមួយច្បាប់ពីឈ្មោះ នួន មាង ភេទស្រី អាយុ៤១ឆ្នាំ នៅភូមិតាពេជ្រខាងត្បូង ឃុំរក្សជ័យ ស្រុកបាភ្នំ ខេត្តព្រៃវែង ពីបទរំលោភសេពសន្ថវៈ លើកូនស្រីរបស់គាត់អាយុ១១ឆ្នាំ បានចំនួន០៥ដង កាលពីខែមីនា ក្នុងឆ្នាំ២០១៩ ក្រោយពេលបានទទួលពាក្យបណ្ដឹង សមត្ថកិច្ចយើងបានកោះហៅឈ្មោះ ពិន ប៊ុន មកសាកសួរតែគាត់បដិសេធថា មិនបានរំលោភលើក្មេងស្រីនោះទេ ។
ដូច្នេះ តាមការស្រាវជ្រាវរបស់សមត្ថកិច្ចឃើញថា ពុំទាន់មានភស្តុតាង និងការឆ្លើយបំភ្លឺរបស់ជនសង្ស័យបដិសេធ ដូច្នេះព្រះរាជអាជ្ញា មិនទាន់ឲ្យធ្វើការឃាត់ខ្លួន ជនសង្ស័យខាងលើទេ ដោយពុំមានភស្តុតាងគ្រប់គ្រាន់ ក្នុងការដាក់បន្ទុករង់ចាំលទ្ធផលឯកសារពិនិត្យការរំលោភផ្លូវភេទ របស់មន្ទីរពេទ្យខេត្តព្រៃវែង ហើយក៏បានអនុញ្ញាតិឲ្យគាត់ទៅផ្ទះវិញ ដោយមានការធានាពីប្រពន្ធ និងកូន ។ ដូច្នេះមិនមានការដោះលែងជនសង្ស័យខាងលើឡើយ ។
មកដល់ថ្ងៃទី០៧ ខែធ្នូ ឆ្នាំ២០១៩ សមត្ថកិច្ចបានធ្វើការកោះហៅឈ្មោះ ពិន ប៊ិន មកសាកសួរម្តងទៀតតែប្រពន្ធ និងកូនជនសង្ស័យប្រាប់ថា គាត់មានជំងឺបេះដូង ត្រូវបានបញ្ជូនទៅព្យាបាល នៅមន្ទីរពេទ្យភ្នំពេញ។
លុះដល់ថ្ងៃទី០៩ ខែធ្នូ ឆ្នាំ២០១៩ ឈ្មោះ ពិន ប៊ុន បានចូលខ្លួនមកបំភ្លឺនៅប៉ុស្តិ៍នគរបាលរដ្ឋបាលរក្សជ័យ ហើយសមត្ថកិច្ចបានសាកសួរបំភ្លឺបន្ថែម បូករួមទាំងលទ្ធផលឯកសារពិនិត្យការរំលោភផ្លូវភេទវិជ្ជមាន ដែលចេញដោយមន្ទីរពេទ្យខេត្ត កម្លាំងនគរបាលក៏បានធ្វើការឃាត់ខ្លួន ជនសង្ស័យតាមបញ្ជារបស់លោក ប៊ូ ប៊ុនហាង ព្រះរាជអាជ្ញាអមសាលាដំបូងខេត្តព្រៃវែង ។
បច្ចុប្បន្នបានបញ្ជូនសំណុំរឿង និងជនសង្ស័យទៅស្ថាប័នអយ្យការ ដើម្បីចាត់ការតាមនីតិវិធី ។
សូមរម្លឹកថា បើតាមបណ្តាញសង្គមហ្វេសប៊ុកបានផ្សព្វផ្សាយថា អធិការស្រុកបាភ្នំ ខេត្តព្រៃវែង ដោះលែងជនសង្ស័យ រំលោភកុមារី អាយុ១១ ឆ្នាំ ក្រោមលេសថា ជនសង្ស័យមិនសារភាព ហើយជនរងគ្រោះគ្មានភស្តុតាង ។ ជនសង្ស័យបានគេចខ្លួនបាត់ក្រោយ នគរបាលស្រុកបាភ្នំដោះលែង ។ ជនរងគ្រោះស្រែករកយុត្តិធម៌ ។
ពាក់ព័ន្ធនឹងបញ្ហានេះ មហាជននាំគ្នារិះគន់ថា នគរបាលស្រុកបាភ្នំ គ្មានជំនាញស្រាវជ្រាវបទល្មើសចាប់រំលោភទេ ព្រោះថា បទល្មើសចាប់រំលោភ មិនមែនផ្អែកទៅលើចំលើយសារភាព ឬ ចំលើយបំភ្លឺរបស់សាក្សីនោះទេ សំខាន់ នគរបាលត្រូវនាំកុមារីរងគ្រោះទៅអោយពេទ្យតុលាការធ្វើកោសល្យវិច្ច័យ ប្រដាប់ភេទ ។ បើពេទ្យតុលាការរកឃើញថា កុមារីរងគ្រោះពិតជាដាច់ប្រដាប់ភេទមែន ទោះគ្មានសាក្សី ឬ ជនសង្ស័យមិនសារភាព ក៏សមត្ថកិច្ចអាចឃាត់ខ្លួនជនសង្ស័យបណ្ដោះអាសន្នដើម្បីស្រាវជ្រាវរកការពិតដែរ មិនមែនជនសង្ស័យមិនសារភាព ដោះលែងភ្លាមៗនោះទេ ។
កុមារីរងគ្រោះបានអោយដឹងថា កាលពីថ្ងៃទី២៩ ខែ វិច្ឆិកា ឈ្មោះ ប៊ិន ប៊ន បានហៅនាងទៅជួយទូលស្រូវពូជលោកយាយនៅឯស្រែក្រោយផ្ទះ ។ ពេលទៅដល់ក្រោយផ្ទះអត់ឃើញលោកយាយ ឈ្មោះ ប៊ិន ប៊ន ក៏ចាប់កុមារីរងគ្រោះរំលោភតែម្ដងហើយបានគំរាមមិនអោយនិយាយប្រាប់អ្នកទេ បើនិយាយខ្លួននឹងសំលាប់ចោល ។
កុមារីរងគ្រោះបានបន្តថា លុះដល់ថ្ងៃទី៦ ខែធ្នូ ឆ្នាំ ២០១៩ រឿងរំលោភនេះ បានដឹងដល់ឪពុកម្ដាយកុមារីរងគ្រោះ ។ ឪពុកម្ដាយកុមារីរងគ្រោះក៏បាននាំកូនមកដាក់ពាក្យបណ្ដឹងនៅ ប៉ុស្ដិ៍នគរបាលរ័ក្សជ័យ ។ នគរបាលប៉ុស្តិ៍រ័ក្សជ័យ ក៏បានហៅជនរងគ្រោះមកសាកសួររួចបញ្ជូនទៅអធិការដ្ឋាននគរបាលស្រុកបាភ្នំ ។ ក្រោយពីនគរបាលស្រុកបាភ្នំ សាកសួរជនសង្ស័យបាន៤ម៉ោង ក៏ដោះលែងជនសង្ស័យទៅវិញ ៕
