ខេត្តកណ្ដាល៖ សមត្ថកិច្ចនគរបាលផ្នែកប្រឆាំងគ្រឿងញៀនក្រុងតាខ្មៅ សហការជាមួយនគរបាលប៉ុស្ដិ៍រដ្ឋបាលដើមមៀន ចាប់ខ្លួនបុរសវ័យចំណាស់ម្នាក់ រួមជាមួយថ្នាំញៀនប្រភេទមេតំហ្វេតាមីនហៅម៉ាទឹកកកចំនួន៣៤កញ្ចប់ បញ្ជូនទៅអធិការការដ្ឋាននគរបាលស្រុក ដើម្បីចាត់ការតាមនីតិវិធី ។
ករណីចាប់ខ្លួនបុរសវ័យចំណាស់ម្នាក់នេះ បានធ្វើឡើងនៅវេលាម៉ោង១០ និង៣០ ព្រឹកថ្ងៃទី៨ ខែធ្នូ ឆ្នាំ២០១៩ ត្រង់ចំណុចមុខមន្ទីរបក្សខេត្តកណ្តាល ស្ថិតក្នុងភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ។
ជនសង្ស័យឈ្មោះ ឯក រស្មី ភេទប្រុស អាយុ៥៦ឆ្នាំ មុខរបរមិនពិតប្រាកដ មានស្រុកកំណើតនៅភូមិសំប៉ាន ឃុំព្រែកអំបិល ស្រុកស្អាង ។ បច្ចុប្បន្ន រស់នៅភូមិព្រែកតាគង់ សង្កាត់ចាក់អង្រែលើ រាធានីភ្នំពេញ ។ ដោយឡែកវត្ថុតាងដកហូតបានមាន៖ ថ្នាំញៀនប្រភេទមេតំហ្វេតាមីនហៅម៉ាទឹកកកចំនួន៣៤កញ្ចប់ ក្នុងនោះធំល្មម១កញ្ចប់ និងម៉ូតូ១គ្រឿង ម៉ាកសង់កូរ៉េ ។


សមត្ថកិច្ចបានឲ្យដឹងថា ជនសង្ស័យខាងលើ គឺជាមុខសញ្ញាជួញដូរគ្រឿងញៀនយ៉ាងសកម្មដែលសមត្ថកិច្ចក្រុងតាខ្មៅ បានកំណត់មុខសញ្ញា និងតាមដានជាយូរមកហើយ តែពុំទាន់មានវត្ថុតាងណាដាក់បន្ទុកចាប់ខ្លួនជនសង្ស័យបានទេ ។ លុះមកដល់ថ្ងៃទី៨ ខែធ្នូ ឆ្នាំ២០១៩ កម្លាំងនគរបាលក្រុងតាខ្មៅ បានសហការជាមួយកម្លាំងនគរបាលប៉ុស្ដិ៍ដើមមៀន ឃាត់ខ្លួនជនសង្ស័យ រួចឆែកឆេររកឃើញថ្នាំញៀនចំនួន៣៤កញ្ចប់ ក៍ចាប់ខ្លួនជនសង្ស័យ បញ្ជូនទៅអធិការដ្ឋាននគរបាលក្រុង ដើម្បីកសាងសំណុំរឿងចាត់ការតាមនីតិវិធី ។
ជនសង្ស័យបានឆ្លើយសារភាពថា ថ្នាំញៀននេះ ពិតជារបស់ខ្លួនពិតប្រាកដមែន ៕