រាជធានីភ្នំពេញ ៖ ស្ថានទូតកម្ពុជា ប្រចាំប្រទេសថៃ បានចេញសេចក្តីប្រកាសព័ត៌មានថា បច្ចុប្បន្ននេះ បងប្អូនពលករខ្មែរ នៅក្នុងប្រទេសថៃ កំពុងបម្រើការងារតាមធម្មតា ពុំមានការធ្វើដំណើរវិលត្រឡប់ ទៅប្រទេសកម្ពុជា ជាគំហុក ដូចដែលសារព័ត៌មានមួយចំនួន បានធ្វើការចុះផ្សាយនោះទេ ។
សេចក្តីប្រកាសព័ត៌មានរបស់ស្ថានទូតកម្ពុជាប្រចាំប្រទេសថៃ ចុះថ្ងៃទី៣០ ខែតុលា ឆ្នាំ២០១៩ លើកឡើងថា កាលពីពេលថ្មីៗនេះ មានសារព័ត៌មានក្នុងស្រុក និងសារព័ត៌មានតាមបណ្តាញសង្គមមួយចំនួន បានយករូបភាព និងក្លីបវិដេអូចាស់ៗ អំពីការចុះត្រួតពិនិត្យពលករបរទេសរបស់អាជ្ញាធរថៃ និងការធ្វើដំណើរឆ្លងកាត់ព្រំដែនវិលត្រឡប់ ទៅចូលរួមបុណ្យចូលឆ្នាំថ្មី ប្រពៃណីជាតិខ្មែររបស់បងប្អូនពលករនាពេលកន្លងមក មកធ្វើការផ្សព្វផ្សាយឡើងវិញ ក្នុងគោលបំណងបង្កការភ្ញាក់ផ្អើល និងអូសទាញឲ្យបងប្អូនពលករត្រឡប់ទៅប្រទេសកម្ពុជាវិញ ដើម្បីកេងចំណេញផ្នែកនយោបាយ ។
ស្ថានទូតបញ្ជាក់ថា បច្ចុប្បន្ននេះ បងប្អូនពលករខ្មែរ នៅក្នុងប្រទេសថៃ កំពុងបម្រើការងារតាមធម្មតា ពុំមានការធ្វើដំណើរវិលត្រឡប់ទៅប្រទេសកម្ពុជាជាគំហុក ដូចដែលសារព័ត៌មានមួយចំនួន បានធ្វើការចុះផ្សាយនោះទេ ។ ជាងនេះទៅទៀត ភាគីថៃ កំពុងតែដំណើរការបន្តទិដ្ឋាការស្នាក់នៅ និងប័ណ្ណអនុញ្ញាតការងារជូនដល់បងប្អូនពលករ អាចស្នាក់នៅ និងធ្វើការនៅក្នុងប្រទេសថៃ បានរហូតដល់ឆ្នាំ២០២២។
ដូច្នេះ សូមបងប្អូនពលករទាំងអស់ រក្សាភាពស្ងៀមស្ងាត់ និងបន្តអនុវត្តការងារជាធម្មតា កុំជឿតាមការផ្សព្វផ្សាយ និងការញុះញង់របស់សារព័ត៌មានមួយចំនួន ដែលជាហេតុបង្កឲ្យបងប្អូនខាតបង់ថវិកា ពេលវេលា និងអាចត្រូវនិយោជកបញ្ឈប់ពីការងារទៀតផង ។
សូមរម្លឹកថា កាលពីថ្ងៃទី៣០ ខែតុលា ឆ្នាំ២០១៩ នាយប៉ុស្តិ៍នគរបាលច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង បានចេញសេចក្តីបំភ្លឺ ច្រានចោលនូវការចុះផ្សាយរបស់កាសែតក្នុងស្រុកមួយ ដែលថា ពលករខ្មែររាប់ពាន់នាក់… នៅតែបន្តវិលត្រឡប់ចូលស្រុកតាមច្រក«ដូង» ៕
