ផ្កាខាត់ណា ជាដំណាំដែលមានតម្រូវការនៅក្នុងទីផ្សារខ្ពស់ អាចដុះលូតលាស់បានពេញមួយឆ្នាំ វាត្រូវការសីតុណ្ហភាពជាមធ្យមពី ១៥ ទៅ ២០ អង្សា ។ វាជាដំណាំមិនសូវពិបាកក្នុងការដាំដុះទេ ។ ខាងក្រោមនេះ ជាវិធីសាស្ត្រក្នុងការដាំដុះផ្កាខាត់ណា នៅក្នុងផើង…
*មុនដាំដុះ៖
– ត្រៀមគ្រាប់ពូជខាត់ណាផ្កា ដែលយើងអាចរកទិញបាននៅតាមហាងកសិកម្មនានា
– ផើងដំណាំ ដែលមានទំហំធំល្មម អាចដាំដុះដំណាំនេះ ឱ្យលូតលាស់បានល្អ ជាទូទៅគួរមានជម្រៅ៣០សង់ទីម៉ែត្រ និងមានរង្វង់មាត់ផើង ប្រមាណ២៥សង់ទីម៉ែត្រ
– ដីជីជាតិ ដីមានលាយល្បាយជីលាមកសត្វស្ងួត ជីកំប៉ុស្ត
*ការសាបកូន៖
– ស្រោចទឹកឱ្យជោគ នៅនឹងថ្នាលដំណាំ
– សាបគ្រាប់ពូជខាត់ណាផ្កាលើថ្នាល ក្នុងជម្រៅ១ ទៅ២សង់ទីម៉ែត្រ
– យកចំបើងគ្របពីលើដី
– ពេលកូនអាយុ២០ទៅ៣០ថ្ងៃ ឬលាស់ស្លឹកពី ៣ ទៅ ៤សន្លឹក យើងអាចដកវាទៅដាំផ្ទាល់បានហើយ
*វិធីដាំដុះ៖
– ចាក់ដីដែលមានលាយល្បាយជីកំប៉ុស្ត ចូលក្នុងផើង
– ជីកជារណ្តៅ ហើយដាក់ជីក្នុងរណ្តៅដំណាំ
– ដកកូនខាត់ណាផ្កាទៅដាំក្នុងរណ្តៅ ហើយលុបដីវិញ
– យកចំបើងគ្របតាមគល់ដំណាំ
*ការថែទាំ៖
– ស្រោចទឹកឱ្យបានគ្រប់គ្រាន់និងទៀងទាត់ ព្រឹក ថ្ងៃត្រង់ និងល្ងាច តែបើមេឃត្រជាក់ យើងគួរស្រោចទឹកម្តងបានហើយក្នុងមួយថ្ងៃ
– ត្រូវចាំថា គួរកុំស្រោចទឹកឱ្យជោគជាំខ្លាំងពេក
– ក្រោយយកកូនទៅដាំរយៈពេល១៥ថ្ងៃ យើងចាប់ផ្តើមជ្រំដីនៅក្បែរគល់របស់វា
– ឧស្សាហ៍ដកស្មៅនៅតាមគល់ដំណាំចេញ ដើម្បីកម្ចាត់ជម្រកសត្វល្អិតបំផ្លាញ
*ការប្រមូលផល៖
– ជាទូទៅ ដំណាំផ្កាខាត់ណានឹងឱ្យផលក្នុងរយៈពេល៦៥ ទៅ ៧៥ថ្ងៃ ឬស្មើនឹងពី ៣ ទៅ ៤ខែ បន្ទាប់ពីដាំដុះ ៕