សព្វថ្ងៃនេះ ដំណាំទំពាំងបាយជូរជាដំណាំដែលកសិករយើងនិយមដាំជាទីបំផុត ហើយភាគច្រើនស្ទើរតែការដាំទាំងអស់ជាលក្ខណៈអាជីវកម្មទ្រង់ទ្រាយធំ។ ប៉ុន្តែក្នុងថ្ងៃនេះដែរយើង នឹងបង្រៀនពីរបៀបដាំទំពាំងបាយជូរនៅក្នុងផើង ដែលវិធីនេះងាយអនុវត្តន៏ ហើយទទួលបានផ្លែឈើធម្មជាតិមកបរិភោគទៀតផង។
១/. ការរៀបចំដាំដុះ ៖
– ជ្រើសរើសផើងដំណាំ ដែលមានទំហំធំល្មម ជាទូទៅ ផើងដំណាំ គួរតែមានជម្រៅ៥០ស.ម និងមានទំហំប្រមាណ៦០ស.ម (តែជាទូទៅ យើងគួរផ្លាស់ប្តូរផើងដំណាំតាមទំហំនៃកូនទំពាំងបាយជូរ)
– ដីដែលមានជីជាតិ ដីកំប៉ុស្ត
– ពូជទំពាំងបាយជូរ (លោកអ្នកអាចរកទិញបានកូនទំពាំងបាយជូរនៅតាមហាងកសិកម្ម ពូជផ្លែធំៗ ពីប្រទេសថៃ ឬអាចទិញពូជខ្មែរ បាននៅចម្ការទំពាំងបាយជូរ ភ្នំបាណន់ ខេត្តបាត់ដំបង)
– ចំអារឫស្សី ដើម្បីទុកធ្វើជាទ្រើង ឱ្យទំពាំងបាយជូរវាឡើង
២/. ការដាំដុះ ៖
– យកផើងដំណាំលាងសម្អាត និងហាលឱ្យស្ងួត ដើម្បីសម្លាប់មេរោគផ្សេងៗមុនដាំដុះ
– ចាក់ដីដែលមានលាយល្បាយជីកំប៉ុស្តចូលក្នុងផើងដំណាំ
– យកកូនទំពាំងបាយជូរ កប់ដាំក្នុងផើងដំណាំ ហើយរោយលប់គល់ដំណាំបន្ថែម
– យកផើងដំណាំទំពាំងបាយជូរ ដាក់នៅទីតាំងដែលមានពន្លឺព្រះអាទិត្យគ្រប់គ្រាន់ (យ៉ាងហោចណាស់ ៦ម៉ោង ក្នុងមួយថ្ងៃ)
– នៅពេលកូនដំណាំលូតលាស់ ត្រូវយកចំអារឫស្សីមកធ្វើជាទ្រើងដំណាំ
៣/. ការថែទាំ ៖
– ត្រូវស្រោចទឹកជាប្រចាំ ឱ្យបានទៀងទាត់ ២ដងក្នុងមួយថ្ងៃ ព្រឹកម្តង ថ្ងៃម្តង តែចៀសវាងកុំស្រោចស្រពច្រើនជ្រុល
– ឧស្សាហ៍ដាក់ជីបំប៉ននៅតាមគល់ដំណាំ ដូចជា បន្លែ ផ្លែឈើ ជាសំណល់ផ្ទះបាយ
៤/. ការប្រមូលផល ៖
– ជាទូទៅ ទំពាំងបាយជូរនឹងផ្តល់ផលយ៉ាងហោចណាស់ ២ ទៅ ៣ឆ្នាំ ក្រោយដាំដុះ
– ទំពាំងបាយជូរអាចនឹងទុំ ផ្តល់ផលនៅចុងខែសីហា ដល់ចុងខែតុលា តែវាអាស្រ័យលើពូជ និងអាកាសធាតុដែលអ្នកដាំដុះ ៕