រាជធានីភ្នំពេញ ៖ រឿងមេតុងទីនវេចលុយរត់ចោលកូនតុងទីននេះ ឧស្សាហ៍កើតមានញឹកញាប់ណាស់ ប៉ុន្តែនៅតែនាំគ្នាលេងដដែល ជាក់ស្តែងនៅព្រឹកថ្ងៃទី២៣ តុលា ២០១៩ នេះ ក្រុមអ្នកលេងតុងទីនប្រមាណជាង៤០នាក់ នាំគ្នាមកប្តឹងនៅសាលាសង្កាត់ចោមចៅ២ ក្រោយពីដឹងថា ចាញ់បោកស្ត្រីម្នាក់មេតុងទីន ដែលប្រមូលលុយជាង២៦ម៉ឺនដុល្លារ រត់គេចទៅបាត់ស្រមោល ។
ស្ត្រីម្នាក់ជាជនរងគ្រោះ បានប្រាប់ឲ្យដឹងថា ស្ត្រីជាមេតុងទីន ឆបោកប្រាក់រាប់សិនម៉ឺនដុល្លារនេះ មានឈ្មោះ មាស សុគន្ធា មានទីលំនៅភូមិចោមចៅ សង្កាត់ចោមចៅ២ ខណ្ឌពោធិ៍សែនជ័យ បានរត់គេចខ្លួនបាត់តាំងពីថ្ងៃទី១៧ តុលា មកម្ល៉េះ ។
ប្រភពដដែលបន្តថា ស្ត្រីសង្ស័យជាមេតុងទីន ប្រើល្បិចប្រមូលលុយយកខ្លួនឯង ហើយឆ្លើយថា អ្នកនេះដេញបាន ឬអ្នកនោះដេញបាន (ប្រមាណជាង២៦ម៉ឺនដុល្លារពីអ្នកចូលរួមលេងជាង១០០នាក់ឯនោះ) តែធាតុពិតមេតុងទីន ប្រមូលយកស្ងាត់ៗ នៅពេលប្រមូលបានច្រើនគួរសមហើយ ជនសង្ស័យវេចលុយរត់គេចទៅបាត់ស្រមោល ទើបកូនតុងទីនផ្អើលឆោឡោរត់ទៅប្តឹងអាជ្ញាធរទប់ស្កាត់ក្រែងជនសង្ស័យមកលួចលក់តូបផ្សារ និងលក់ផ្ទះទៀត ៕