រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញ នៅម៉ោង១២ថ្ងៃទី ១៤តុលា ឆ្នាំ២០១៩នេះ បានសម្រេច ចេញដីការឲ្យឃុំខ្លួន ជនជាតិឥណ្ឌាម្នាក់ ដែលលួចផលិតឱសថគ្មានគុណភាព ចែកចាយក្នុងប្រទេសកម្ពុជា ដាក់ឃុំខ្លួននៅពន្ធនាគារជាបណ្ដោះអាសន្ន ។
ការសម្រេចឃុំខ្លួននេះ បានធ្វើឡើងបន្ទាប់ពីតំណាងអយ្យការចោទប្រកាន់លើជនត្រូវចោទ មានឈ្មោះ រ៉ូយ៉ាល់ បាទិក ភេទប្រុស ជនជាតិឥណ្ឌា ពីបទផលិតឱសថដោយគ្មានការអនុញ្ញាត តាមមាត្រា៥៩ នៃច្បាប់ស្ដីពីស្តង់ដាកម្ពុជា ។
ជនជាប់ចោទជាម្ចាស់សហគ្រាសផលិតឱសថ មានទីតាំងស្ថិតនៅក្នុងសង្កាត់ទន្លេបាសាក់ ខណ្ឌចំការមន និងទីតាំងមួយទៀត ស្ថិតនៅក្នុងតំបន់សេដ្ឋកិច្ចពិសេស ខណ្ឌកំបូល ផ្លូវជាតិលេខ៤ ។
សូមរម្លឹកថា ជនត្រូវចោទ រ៉ូយ៉ា បាទិក ត្រូវបានសមត្ថកិច្ចក្រសួងមហាផ្ទៃចាប់ខ្លួនកាលពីថ្ងៃទី ១១តុលា ឆ្នាំ២០១៩នេះ នៅក្នុងសហគ្រាសផលិតឱសថ នៅក្នុងសង្កាត់ទន្លេបាសាក់ ខណ្ឌចំការមន ។ បន្ទាប់មកព្រះរាជអាជ្ញាអមតុលាការ បានដឹកនាំការត្រួតពិនិត្យកន្លែងផលិតឱសថរបស់គាត់ មួយកន្លែងទៀត នៅក្នុងខណ្ឌកំបូលក្នុងតំនប់សេដ្ឋកិច្ចពិសេសភ្នំពេញ ៕
