រាជធានីកណ្ដាល ៖ ក្រោយពីបញ្ចប់ពិធីបុណ្យអុំទូក បណ្ដែតប្រទីប និងសំពះព្រះខែ នៅក្រុងតាខ្មៅ ខេត្តកណ្ដាល រយៈពេល២ថ្ងៃ ទី១២-១៣ តុលា ២០១៩នេះ នៅព្រលឹមថ្ងៃទី១៤ តុលានេះ ក្រុមអនាម័យក្រុងតាខ្មៅជិត៣០នាក់ ចាប់ផ្ដើមសម្អាតបរិស្ថាន នៅតាមបណ្ដោយសួនច្បារមាត់ទន្លេ សួនច្បារមាត់ស្ទឹង សំអាតតាមបណ្ដោយផ្លូវមួយចំនួន ដែលមានសំរាមច្រើនស្កេកស្កះ ដែលកើតមានដោយបងប្អូន ដែលមកទស្សនាពិធីបុណ្យអុំទូក មិនបានទុកដាក់សំរាមត្រឹមត្រូវ ។
អ្វីដែលគួរឲ្យហួសចិត្តជាខ្លាំងនោះ(ដូចក្នុងរូបភាព) បើទោះបីជាមានថង់សម្រាប់វេចខ្ចប់ដាក់សំរាមឲ្យបានល្អមានសណ្ដាប់ធ្នាប់ ដើម្បីងាយប្រមូលក្តី ក៏មានបងប្អូនមួយចំនួនតូច ចោលសំរាមក្រៅធុងដែរ ធ្វើឲ្យសំរាមរប៉ាត់រប៉ាយជាដើម ។ ប្រជាពលរដ្ឋខ្លះមានចម្ងល់ថា ហេតុអីក៏បងប្អូនខ្មែរយើង នៅតែបន្តធ្វើរឿងដដែលបែបនេះ ?
ទន្ទឹមនេះដែរ អ្នកដែលមកប្រមូលសំរាមនៅក្រុងតាខ្មៅ ក៏អំពាវដែរជុំវិញឥរិយាបទពលរដ្ឋយើងមួយចំនួនតូច ខ្វះការសហការពីការទុកដាក់ និងចោលសំរាមផ្ដេសផ្ដាស ហើយក៏សំណូមពរពលរដ្ឋទាំងអស់ដែលមកលេងកម្សាន្ត ត្រូវចូលរួមថែរក្សាបរិស្ថាន កុំចោលសម្រាមផ្ដេសផ្ដាស ពិសេសសូមរក្សាភាពថ្លៃថ្នូរទាំងអស់គ្នា ។ សង្ឃឹមថា ពលរដ្ឋយើងនឹងចាប់ផ្ដើមភ្ញាក់ខ្លួន និងកែឥរិយាបថឲ្យល្អប្រសើរឡើងវិញ ដើម្បីជាគំរូល្អដល់ក្មេងជំនាន់ក្រោយ និងមុខមាត់ប្រទេសយើងផងដែរ ៕
