ខេត្តសៀមរាប ៖ ជនដៃដល់ពីរនាក់ប្រុស-ស្រី ត្រូវសមត្ថកិច្ចចាប់ឃាត់ខ្លួនកាលពីថ្ងៃទី២៩ ខែកញ្ញា បន្ទាប់ពីបង្កហិង្សា ដោយគ្រាន់តែជនរងគ្រោះមើលមុខ នៅក្នុងហាងផឹកស៊ី យីហោ «ធីមផលបារ» ដែលស្ថិតក្នុងសង្កាត់ស្វាយដង្គុំនៃក្រុងសៀមរាប ។
សមត្ថកិច្ច បានឲ្យដឹងថា ក្នុងហេតុការនេះគឺគ្រាន់តែជនរងគ្រោះមើលមុខ ក៏កើតជាជម្លោះពាក្យសម្តី រហូតឈានដល់ ភាគីជនបង្ក២នាក់(ជាមិត្តភក្តិនឹងគ្នាស្រីប្រុស) យកកែវស្រា វាយជនរងគ្រោះឈ្មោះ ឆៃ វឌ្ឍនា ភេទប្រុស អាយុ២៩ឆ្នាំមុខរបរយោធា បណ្តាលអោយរយះក្បាល ។
ប្រភពពីសាក្សីនៅកន្លែងកើតហេតុបានប្រាប់ថា ជនរងគ្រោះនិងមិត្តភក្កិផ្សេងទៀតបាននាំគ្នាចូលទៅផឹកស៊ី នៅក្នុងហាងខាងលើ
ក្នុងពេលដែលមិនទាន់បានផឹកផង ដើររកកន្លែងអង្គុយ ពេលនោះពួកគេក៏បានជួបនឹងជនដៃដល់ឈ្មោះ ឡៅ ជីងលី ភេទប្រុស អាយុ៣០ឆ្នាំ ជាអ្នក រាជធានីភ្នំពេញដូចគ្នា ។ ពេលនោះឈ្មោះ តុប សុភក្ត្រា(ត្រូវជាមិត្តភក្តិជនរងគ្រោះឈ្មោះ ឆៃ វឌ្ឍនា) បានមើលមុខ ឈ្មោះ ឡៅ ជីងលី ទើបឈ្មោះឡៅ ជីងលី និយាយថា អាអែងមើលមុខអី ? ក្នុងគ្រានោះ ភាគីទាំងពីរ បាននិយាយប្រកែកគ្នាទៅវិញទៅមក រហូតមានជម្លោះពាក្យសម្ដី ហើយឈ្មោះ ឡៅ ជីងលី បានស្ទុះមកវាយលើឈ្មោះ តុប សុភក្ត្រា ហើយឈ្មោះ ឆៃ វឌ្ឍនា ក៏បានចូលទៅជួយឃាត់ ក៍ត្រូវបានឈ្មោះ ឡៅ ជីងលី យកកែវស្រា ដែលជាកែវថ្ម វាយមកលើឈ្មោះ ឆៃ វឌ្ឍនា ត្រូវចំក្បាលបណ្ដាលឲ្យរយះបែក ចំនួន០២កន្លែង ផ្នែកខាងស្តាំ ដេរ០៤ថ្នេរ ផ្នែកខាងឆ្វេងដេរមួយថ្នេរ និងលើចង្អុលដៃខាងស្ដាំ ដេរចំនួន៣ថ្នេរ ។ ចំណែកឈ្មោះ ឡៅ ជីងលី នៅពេលវាយទៅលើជនរងគ្រោះ ក៍ត្រូវសមត្ថកិច្វនាំខ្លួនភាគីទាំងសងខាង យកមកធ្វើការសាកសួរ ក្រោយពីការសាកសួរឈ្មោះឡៅ ជីងលី បានសារភាពថា ខ្លួនពិតជា បានវាយទៅលើ ឈ្មោះ ឆៃ វឌ្ឍនា បណ្ដាលឲ្យរងរបួសដូច បានរៀបរាប់ខាងលើពិតមែន ។
ក្នុងពេលនាំខ្លួនទៅសាកសួរនោះដែរ ជនដៃដល់ ក៏បានទះកំផ្លៀងទៅលើ មន្ត្រីនគរបាលអន្តរាគមន៍ម្នាក់ ត្រូវ១កំផ្លៀងផងដែរ នៅមុខមហាជន ប៉ុន្តែក្រោយពេលស្វាងស្រា ក៏សុំទោសមកលើនគរបាល វិញដែរ ។ យ៉ាងណាក៏សមត្ថកិច្ចមិនបង្ហាញឈ្មោះស្ត្រីម្នាក់ ដែលជាបក្ខពួកជនបង្កឡើយ ត្រឹមតែបញ្ជាក់ថា ឃាត់ខ្លួនភាគីប្រុសស្រីទាំងពីរនាក់ ។
បច្ចុប្បន្ន នគរបាល កសាងសំណុំរឿង បញ្ជូនខ្លួនជនសង្ស័យ ទាំង២នាក់ ទៅតុលាការ ដើម្បីចាត់ការបន្ត តាមច្បាប់ ៕
