សៀមរាប ៖ ករណីគ្រោះថ្នាក់ក្រឡាប់រថយន្តក្រុងវីរៈប៊ុនថាំ ប្រភេទ២ជាន់ ៤៥កៅអី បើកបរចេញពីសៀមរាប ឆ្ពោះទៅភ្នំពេញ បានវាក់នឹងស្ពាន ទើបតៃកុងរថយន្តជាន់ហ្វាំងអូសប្រមាណជា១៥ម៉ែត្រ ទើបក្រឡាប់ពីរត្រឡប់ ធ្វើអោយអ្នកដំណើរទាំងអស់រងរបួសធ្ងន់ស្រាល ខ្លះត្រូវដៃ ខ្លះត្រូវជើង ខ្លះបោកក្បាលនឹងកញ្ចក់បណ្តាលអោយហូរឈាមដាបដេកដួលរដូករណែលស្រែកយំពេញរថយន្ត ។
ហេតុការណ៍ដ៍តក់ស្លុតនេះបានកើតឡើងតាមបណ្តោយផ្លវជាតិលេខ៦ ចំណុចមុខបន្ទាយយោធាស្រុកសូទ្រនិគម នៅវេលាម៉ោង ០៨និង៤៥នាទីយប់ ថ្ងៃទី២៩ កញ្ញា ២០១៩ ស្ថិតក្នុងភូមិថ្នល់ចែង ឃុំសាលាកកោះ ស្រុកសូទ្រនិគម ខេត្តសៀមរាប ។
ស្ត្រីរងរបួសជើងនិងហើមថ្គាម ជាជនរងគ្រោះម្នាក់ ក្នុងគ្រោះថ្នាក់ចរាចរណ៍ក្រឡាប់រថយន្តក្រុងវីរៈប៊ុនថាំ បានរៀបរាប់ពីហេតុការណ៏នោះថា ពួកគាត់បានជិះរថយន្តក្រុងពេលយប់ របស់ក្រុមហ៊ុនដឹកអ្នកដំណើរវីរៈប៊ុនថាំ ក្នុងទិសដៅពីខេត្តសៀមរាប ឆ្ពោះទៅកាន់ រាជធានីភ្នំពេញ លុះ ចេញបានប្រហែល៣០គីឡូ ដល់ស្រុកសូទ្រនិគម ស្រាប់តែ រថយន្តនេះបានរេចង្កូតធ្លាក់ផ្លូវក្រឡាប់ បណ្តាលអោយអ្នកដំណើរព្រលឹងចុងសក់គ្រប់ៗគ្នា និងរងរបួសធ្ងន់ស្រាលជាច្រើននាក់ ។
ស្ត្រីរងគ្រោះបានបន្តថា បន្ទាប់ពីកើតហេតុ មានបុគ្គលិកក្រុមហ៊ុនវីរៈប៊ុនថាំ បានបញ្ចុះបញ្ចូលឲ្យជនរងគ្រោះទាំងអស់ ឡើងជិះរថយន្តក្រុងមួយគ្រឿងទៀត សាងបន្តទៅភ្នំពេញ ប៉ុន្តែក្នុងចំណោមនោះមានជនរងគ្រោះជិត២០នាក់ មិនព្រមឡើងជិះតាមការរៀបចំរបស់ក្រុមហ៊ុនទេ ព្រោះពួកគាត់បានជួបប្រទះគ្រោះថ្នាក់នេះ គឺដិតដាមជាប់អារម្មណ៏នៅឡើយ ។
រហូតមកដល់ព្រឹកថ្ងៃទី៣០ កញ្ញា នេះរថយន្តក្រុងដែលក្រឡាប់នោះ ត្រូវបានក្រុមហ៊ុនវីរៈប៊ុនថាំ អោយរថយន្តស្ទូចយកចេញពីទីតាំងកើតហេតុបាត់ទៅហើយ ។ អ្វីដែលហួសចិត្តនោះ គឺនៅពេលដែលស្ទូចរថយន្តក្រុងក្រឡាប់នោះ ខាងក្រុមហ៊ុនប្រុងនាំយកឥវ៉ាន់របស់អ្នកដំណើរទាំងអស់នៅជាមួយ ប៉ុន្តែមានការតវ៉ាខ្លាំងទើបក្រុមហ៊ុនព្រមប្រគល់ឥវ៉ាន់និងវាលីឲ្យមកជនរងគ្រោះវិញ ។
មុននាំរថយន្តក្រុងដែលក្រឡាប់នោះទៅ បុគ្គលិកក្រុមហ៊ុនវីរៈប៊ុនថាំ បានបញ្ជាក់យ៉ាងខ្លីថា «គ្រោះថ្នាក់នេះ ទុកអោយក្រុមហ៊ុនធានារ៉ាប់រងជាអ្នកទទួលដោះស្រាយ ព្រោះរថយន្តក្រុងនេះ ទិញធានារ៉ាប់រងរបស់ក្រុមហ៊ុនកាំមិនកូ» ។
គិតមកដល់រសៀលថ្ងៃទី៣០ កញ្ញា ២០១៩នេះ ក្រុមអ្នកដំណើរដែលរងរបួស ក្នុងគ្រោះថ្នាក់ក្រឡាប់រថយន្តក្រុងវីរៈប៊ុនថាំ នេះបានអំពាវនាវដល់ អាជ្ញាធរមានសមត្ថកិច្ច ជួយអន្តរាគម៌ជាបន្ទាន់ ជូនពួកគាត់ផង ព្រោះថា ជនរងគ្រោះទាំងអស់ នៅមិនទាន់ទទួលបានការសម្របសម្រួលណាមួយពីសំណាក់ក្រុមហ៊ុនវីរៈប៊ុនថាំ ឫខាងក្រុមហ៊ុនធានារ៉ាប់រង កាំមិនកូ នៅឡើយទេ ៕
