ភ្នំពេញ ៖ ផ្ញើជូនលោកអ្នកដែលទៅស្រុកកំណើត រឺប្រជាពលរដ្ឋធ្វើដំណើរ សូមឲ្យប្រុងប្រយ័ត្នខ្ពស់ ពិសេស មុនពេលចេញពីផ្ទះ ឬបន្ទប់ជួល ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរនេះ សូមបងប្អូនបង្ការគ្រោះអគ្គិភ័យ និងឧបទ្ទេវហេតុផ្សេងៗ ដែលអាចកើតមានឡើងជាយថាហេតុ ជាមុនសិន ។
មុនចាកចេញពីទីលំនៅ គឺត្រូវធ្វើរឿងទាំងនេះសិន ៖
-បិទទឹក (បើអាច)
-បិទកុងតាក់ភ្លើង
-បិទហ្គាស
-បិទទ្វារ និងបង្អួចផ្ទះហើយចាក់គន្លឹះ និងសោអោយជាប់
-ពិនិត្យមើលទានធូប ដែលដាក់សែន(ត្រូវប្រាកដថា រលត់អស់ហើយ)
-សូមពិនិត្យមើលរបស់របរជុំវិញខ្លួន និងជុំវិញផ្ទះម្តងទៀតថា មានរៀបរយហើយរឺនៅ ? មានភ្លេចអីទៀត រឺក៏អត់ ? ឲ្យច្បាស់សិនសុំចាកចេញពីផ្ទះ ។
ជាមួយគ្នានេះដែរ អ្នកបើកបរយានយន្ត សូមចូលរួមគោរពច្បាប់ចរាចរណ៍ផ្លូវគោក បើកបរឱ្យមានការប្រុងប្រយ័ត្នខ្ពស់ មិនត្រូវបើកបរក្រោមឥទ្ធិពល នៃគ្រឿងស្រវឹងដាច់ខាត ត្រូវចេះគោរពសិទ្ធិអាទិភាព និងមានការអធ្យាស្រ័យខ្ពស់ រាល់ពេលបើកបរ ធ្វើយ៉ាងណាចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក ។
សូមជូនពរបងប្អូនខ្មែរគ្រប់រូប ធ្វើដំណើរប្រកបដោយភាពរីករាយ និងសុខសប្បាយទាំងអស់គ្នា ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ខាងមុខនេះ ៕
