ក្រុងកោះរ៉ុង ៖ ក្រោយមានអ្នកតវ៉ាច្រើន នៅលើបណ្តាញសង្គម អំពីបញ្ញត្តិរបស់ចៅសង្កាត់កោះរ៉ុងសន្លឹម ហាមមិនអោយប្រជាពលរដ្ឋចិញ្ចឹមសត្វឆ្កែ ក្រោមហេតុផលថា ខ្លាចខាំដល់អ្នកទេសចរណ៍នោះ លោក នួន ប៊ុនថុល អភិបាលក្រុងកោះរ៉ុង មានប្រសាសន៍ថា «ឥឡូវនេះ អាជ្ញាធរសង្កាត់កោះរ៉ុងសន្លឹម បានដកបម្រាមនោះវិញហើយ ដោយកែតម្រូវថា ប្រជាពលរដ្ឋនៅកោះរ៉ុងសន្លឹម អាចចិញ្ចឹមសត្វឆ្កែបាន ប៉ុន្តែត្រូវចង ឬរក្សាឃុំគ្រង អោយបានល្អ កុំអោយខាំគេឯង ឬខាំអ្នកទេសចរណ៍ ។ ហើយក្នុងករណី បើសិនមានសត្វឆ្កែ បានខាំគេឯង ឬអ្នកទេសចរណ៍ ម្ចាស់ចិញ្ចឹមនោះ ត្រូវទទួលខុសត្រូវចំពោះមុខច្បាប់» ។
លោក នួន ប៊ុនថុល បញ្ជាក់បែបនេះ បន្ទាប់ពីមានសេចក្ដីជូនដំណឹងមួយរបស់លោក ឈឺន ចន្ថា ចៅសង្កាត់កោះរ៉ុងសន្លឹម បានប្រកាសឱ្យបងប្អូនដែលរស់នៅភូមិ២ គឺភូមិកោះតូច និងភូមិកោះរ៉ុងសន្លឹម បញ្ឈប់ការចិញ្ចឹមសត្វឆ្កែ ដោយទុកពេល៣០ថ្ងៃ ដើម្បីឱ្យយកឆ្កែទាំងនោះចេញពីសង្កាត់ ហើយដល់ពេលកំណត់រដ្ឋបាលសង្កាត់ នឹងចាប់យកទាំងអស់ ។
បើតាមសេចក្ដីជូនដំណឹងដដែល បានឱ្យដឹងថា មានប្រជាពលរដ្ឋ និងភ្ញៀវទេសចរណ៍ជាច្រើន បានរងគ្រោះដោយសារឆ្កែខាំ ដូចនេះរដ្ឋបាលសង្កាត់ត្រូវពង្រឹងវិធានការពារ ដើម្បីកំណើនភ្ញៀវទេសចរ ។ ម្យ៉ាងទៀត ការធ្វើបែបនេះ ក៏ដើម្បីរៀបចំសណ្ដាប់ធ្នាប់ សន្តិសុខនៅតំបន់ទេសចរណ៍នេះផងដែរ ។ ពេលកំណត់ ៣០ថ្ងៃ នឹងបញ្ចប់នៅថ្ងៃទី០២ ខែតុលា ខាងមុខនេះ ៕
