រាជធានីភ្នំពេញ ៖ តាមរយៈសេចក្តីប្រកាសព័ត៌មាននៅថ្ងៃទី២៦ ខែសីហា ឆ្នាំ២០១៩នេះ ក្រុមហ៊ុនរបស់លោកស្រី កែវ ម៉ាលី បានសងប្រាក់សរុបជិត៣លានដុល្លារអាមេរិក ទៅធនាគារ BIDC របស់វៀតណាម រួចរាល់ហើយ ។
ក្នុងសេចក្តីប្រកាសព័ត៌មានបានបញ្ជាក់ថា «ក្រុមហ៊ុន កែវ ម៉ាលី គ្រុប បានសងប្រាក់ទៅធនាគារវៀតណាម BIDC ចំនួន ២,៧៧១,៥៣៦.៧៤ដុល្លារ រួមទាំងការប្រាក់គ្រប់ចំនួនអស់ហើយ» ។
ធនាគារ BIDC របស់វៀតណាម តាមរយៈសាលាដំបូងរាជធានីភ្នំពេញ កាលពីដើមខែសីហា កន្លងទៅនេះ ប្រកាសលក់អចលនទ្រព្យរបស់ក្រុមហ៊ុនរបស់លោកស្រី កែវ ម៉ាលី ចំនួន២៦បណ្ណ ចំនួនប្រមាណ៧លាន២សែនដុល្លារ ដើម្បីរឹបអូសយកប្រាក់ដែលក្រុមហ៊ុននៅជំពាក់ខ្លួន ។ ក្រុមហ៊ុនរបស់លោកស្រី កែវ ម៉ាលី បានសម្តែងការខកចិត្តផងដែរ ចំពោះធនាគារមួយនេះ ដែលចង់លក់ឡៃឡុងអចលនទ្រព្យរបស់ខ្លួន ដោយចាត់ទុកជាកាយវិការចង់លេបយកទ្រព្យសម្បត្តិរបស់លោកស្រី ។ ការប្រកាសលក់ឡៃឡុងពីសំណាក់ធនាគារនេះ ក្រុមហ៊ុនបានប្តឹងទៅសាលាឧទ្ធរណ៍ ដើម្បីជំទាស់នឹងការលក់ឡៃឡុងរបស់ធនាគារ ។ តាមរយៈសេចក្តីប្រកាសព័ត៌មាននៅថ្ងៃនេះ លោកស្រី កែវ ម៉ាលី បានសម្តែងការសោកស្តាយចំពោះវិធានការរបស់ធនាគារ និងចាត់ទុកជាទង្វើជាន់ពន្លិចអតិថិជនរបស់ខ្លួនទៅវិញ ។
លោកស្រី កែវ ម៉ាលី បានចាត់ទុកតាមរយៈការផ្សព្វផ្សាយទម្លាយព័ត៌មានពីការលក់ឡៃឡុងអចលនទ្រព្យរបស់លោកស្រី ដែលពុំទាន់ជាក់លាក់ពិតប្រាកដទាំងអស់នេះ បានធ្វើឱ្យប៉ះពាល់កិត្តិយស និងសេចក្តីថ្លៃថ្នូររបស់លោកលោកស្រីយ៉ាងធ្ងន់ធ្ងរ ក៏ដូចជាបំបាក់ស្មារតី ដើម្បីលេបយកដី និងទ្រព្យសម្បត្តិរបស់ក្រុមហ៊ុនទាំង២៦បណ្ណ ពីតម្លៃខ្ពស់មកតម្លៃទាបត្រឹមជាង៧លានដុល្លារប៉ុណ្ណោះ។
សូមរម្លឹកថា បីចំណុចរបស់ក្រុមហ៊ុនលោកជំទាវ កែវ ម៉ាលី ជំទាស់រឿងតុលាការប្រកាសលក់ឡាយឡុង
