ខេត្តរតនគិរី ៖ រយៈពេល២ថ្ងៃ កម្លាំងអាវុធហត្ថមូលដ្ឋានស្រុកវ៉ើនសៃ សហការជាមួយកម្លាំងនគរបាលស្រុកវ៉ើនសៃ បានចុះរឹបអូសឈើកកោះចំនួន៣២សន្លឹក និងឈើធ្នង់ចំនួន១០៨ដុំ ។
លោកឧត្តមសេនីយ៍ត្រី នូវ ដារ៉ា ស្នងការរងទទួលផែន ប្រឆាំងបទល្មើសសេដ្ឋកិច្ច បានដឹកនាំកម្លាំងនគរបាលជំនាញ ចុះរុករកប្រទះឃើញគំនរឈើកកោះចំនួន៣២សន្លឹក ដែលក្រុមឈ្មួញគរលាក់ទុកក្នុងព្រៃ ស្ថិតក្នុងភូមិប៉ុង ឃុំប៉ុង ស្រុកវ៉ើនៃ កាលពីថ្ងៃទី៩ ខែកក្កដា ម្សិលមិញ លុះព្រឹកឡើងថ្ងៃទី១០ ខែកក្កដា ឆ្នាំ២០១៩ ដោយមានការសម្របសម្រួលពីលោក លាង អ៊ូ ព្រះរាជអាជ្ញារងអមសាលាដំបូងខេត្តរតនគិរី កម្លាំងរបស់លោកសហការជាមួយកម្លាំងនគរបាលស្រុកវ៉ើនសៃ បានចុះឆែកឆេរទីតាំងស្តុកឈើមួយកន្លែង ស្ថិតក្នុងភូមិប៉ុង ឃុំប៉ុង ស្រុកវ៉ើនសៃ ដែលមានម្ចាស់ឈ្មោះ ស៊ីង ប៊ុតស៊ី អាយុ៣០ឆ្នាំ ជនជាតិឡាវ រឹបអូសឈើធ្នង់បានចំនួន១០៨ដុំ ។
បច្ចុប្បន្នវត្ថុតាងទាំងអស់ ដឹកមករក្សាទុកនៅអធិការដ្ឋាននគរបាលស្រុកវើនសៃ រួចបានប្រគល់ឲ្យខណ្ឌរដ្ឋបាលព្រៃឈើចាត់ការបន្ត ៕
