រាជធានីភ្នំពេញ ៖ ដោយផ្អែកលើប្រភពអគ្គិសនីរួមមាន រោងចក្រអគ្គិសនីដើរដោយធ្យូងថ្ម, ហ្គាស, ប្រេងខ្មៅ និងរោងចក្រអគ្គិសនីដើរដោយពន្លឺព្រះអាទិត្យនោះ ប្រមុខរាជរដ្ឋាភិបាលកម្ពុជា បានថ្លែងបញ្ជាក់ថា ឆ្នាំក្រោយមិនមានរឿងកង្វះអគ្គិសនីប្រើប្រាស់ទៀតឡើយ ពោលគឺគ្មានរឿងច្រំដែលនោះទេ នេះបើតាមទីភ្នាក់ងារសារព័ត៌មានកម្ពុជា ។
សម្ដេចអគ្គមហាសេនាបតីតេជោ ហ៊ុន សែន បានថ្លែងបែបនេះ នៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញ ចំនួន៣១៦១នាក់ នាព្រឹកថ្ងៃទី០៣ ខែមិថុនា ឆ្នាំ២០១៩ នៅមជ្ឈមណ្ឌលសន្និបាត និងពិព័រណ៍កោះពេជ្រ ។
សម្ដេចតេជោ ហ៊ុន សែន ចាត់ទុកថា ការខ្វះខាត់អគ្គិសនីក្នុងឆ្នាំនេះ ក្លាយជាបទពិសោធន៍ និងផ្តល់ជាមេរៀនយ៉ាងច្រើន សម្រាប់រាជរដ្ឋាភិបាលកម្ពុជា ប៉ុន្តែឆ្លងកាត់មេរៀនទាំងនេះ សម្ដេចតេជោបញ្ជាក់ថា នឹងគ្មានបញ្ហាច្រំដែលនេះ កើតឡើងទៀតឡើយនៅឆ្នាំក្រោយ ។
សម្ដេចតេជោ ថ្លែងដូច្នេះថា «បទពិសោធន៍ឆ្នាំនេះ ផ្ដល់មេរៀនឱ្យយើង ដូច្នេះហើយបាន ជាការរៀបចំសម្រាប់ឆ្នាំក្រោយ គឺបានរៀបចំនូវរោងចក្រអគ្គិសនីដើរដោយធ្យូងថ្ម មានអានុភាពចំនួន៣៧០មេហ្គាវ៉ាត់ បានដំណើរការរួចរាល់ហើយៗនៅសល់រោងចក្រមួយទៀត មានអានុភាពចំនួន១៣៥មេហ្គាវ៉ាត់ ដែលកំពុងខិតខំដាក់ឱ្យដំណើរការក្នុងថ្ងៃនេះ ។ ទីក្រុងភ្នំពេញយើងត្រូវត្រៀមអគ្គិសនីចំនួន៤០០មេហ្គាវ៉ាត់ ដែលឥឡូវបានអនុម័តថវិការួចហើយ ដើម្បីចាប់ផ្ដើមបញ្ជាទិញម៉ាស៊ីន ដោយធ្វើយ៉ាងណារៀបចំឱ្យហើយនៅខែតុលាខាងមុខ ដែលក្នុងនោះ២០០មេហ្គាវ៉ាត់ ទិញពីប្រទេសហ្វាំងឡង់ និង២០០មេហ្គាវ៉ាត់ ទិញពីប្រទេសអាល្លឺម៉ង់ ដោយយកមកដំឡើងត្រៀមទុក នូវពេលដែលវារីអគ្គិសនីបញ្ចេញភ្លើងមិនគ្រប់ ។ ដូច្នេះឆ្នាំក្រោយទីក្រុងភ្នំពេញគ្មានហេតុផល ដែលនិយាយថា ខ្វះអគ្គិសនី ហើយត្រូវការទិញទៀតនោះទេ» ។
សម្តេចតេជោ បានឲ្យដឹងដែរថា ក្នុងអំឡុងពេលដំណើរទស្សនកិច្ចនៅប្រទេសជប៉ុន កាលពីសប្តាហ៍មុននេះ សម្តេចបានពិភាក្សាជាមួយ នាយករដ្ឋមន្ត្រីជប៉ុន ដើម្បីស្នើដល់រដ្ឋាភិបាលជប៉ុនឲ្យជួយដល់កម្ពុជា លើបញ្ហាខ្វះខាតអគ្គិសនី ដោយសុំឲ្យជប៉ុនផ្តល់នូវហិរញ្ញប្បទាន ដើម្បីបន្តការវិនិយោគលើបណ្តាញតង់ស្យុងខ្ពស់៥០០គីឡូវ៉ុល ចាប់ពីព្រំដែនឡាវ មកដល់រាជធានីភ្នំពេញ ដែលមានចម្ងាយ៣៥០គីឡូម៉ែត្រ ព្រោះកម្ពុជាបានចរចាជាមួយឡាវរួចហើយ ដោយឡាវមានអគ្គិសនីតែគ្មានទីផ្សារដើម្បីបញ្ចេញ ។
សម្ដេចតេជោ បន្ថែមទៀតថា ជាងនេះទៀត ក៏មានម៉ាស៊ីនមួយចំនួនកំពុងតែតម្លើងផងដែរ ដូចជាក្រុមហ៊នមកពីប្រទេសម៉ាឡេស៊ី កំពុងតម្លើងនៅឯខេត្តព្រះសីហនុ ដែលមានអានុភាព១៣៥មេហ្គាវ៉ាត់ ដោយយកម៉ាស៊ីន ពីក្រុមហ៊ុន JE របស់អាម៉េរិក យកមកដំឡើងដោយ ក្រុមហ៊ុន តូស៊ីបា របស់ជប៉ុន ។ ដូច្នេះយើងត្រូវមានថាមពលអគ្គិសនីដើរដោយទឹក នៅរដូវវស្សា ។ ហើយសម្រាប់ខែប្រាំង យើងត្រូវមានថាមពលអគ្គិសនី ដើរដោយទឹកផង រួមជាមួយ ធ្យូងថ្ម ហ្គាស និងប្រេងខ្មៅផងដែរ ។
សម្ដេចតេជោ គូសបញ្ជាក់ថា ផែនការអគ្គិសនីត្រូវរៀបចំឡើងវិញ ដើម្បីអោយទាន់នឹងការរីកលូតលាស់របស់ប្រទេស ។
ទោះជាយ៉ាងណាសម្ដេចតេជោនាយករដ្ឋមន្ត្រីក៏បានថ្លែងនូវការអធ្យាស្រ័យពីសំណាក់ប្រជាពលរដ្ឋ ដែលកន្លងទៅ មានកាត់ផ្ដាច់ភ្លើង ឆ្លាស់គ្នាម្តងនៅកន្លែងនេះ ម្តងនៅកន្លែងនោះ ធ្វើឱ្យប្រជាពលរដ្ឋជួបការលំបាក ក៏ប៉ុន្តែ ឥឡូវនេះ តាមរយៈការខិតខំរបស់រាជរដ្ឋាភិបាល នៅឆ្នាំក្រោយ មិនមានរឿងច្រំដែល កើតឡើងរឿងកង្វះអគ្គិសនីទៀតទេ បើទោះបីជាវារីអគ្គិសនីដើរមិនបាន(អត់ទឹក) ក៏យើងមានអគ្គិសនីដែលដើរដោយធ្យូងថ្ម ហ្គាស និងប្រេងឥន្ធនៈ ដើម្បីបំពេញឲ្យការខ្វះខាត ៕
