រាជធានីភ្នំពេញ ៖ កម្លាំងនគរបាលព្រហ្មទណ្ឌខណ្ឌចំការមន សហការជាមួយកម្លាំងនគរមូលដ្ឋាន តាមចាប់ខ្លួនជនសង្ស័យមួយក្រុម ក្រោយពួកគេធ្វើសកម្មភាពឆក់ទូរស័ព្ទពីស្ត្រីជនបរទេសម្នាក់ បានសម្រេច កាលវេលាម៉ោង១១យប់ ថ្ងៃទី១១ ឧសភា ២០១៩ នៅចំណុចមុខផ្ទះលេខ១០២ ផ្លូវ១១៣ ស្ថិតនៅភូមិ២ សង្កាត់ បឹងកេងកងទី២ ខណ្ឌចំការមន រាជធានីភ្នំពេញ ។
លោកអធិការរង ហ៊ាង ថារ៉េត ទទួលផែនយុត្តធម៌ខណ្ឌចំការមន បានឲ្យដឹងថា ជនសង្ស័យទាំង៥នាក់ មាន ៖ ទី១ ឈ្មោះ វ៉ាន់ សុខណាន់ ភេទប្រុស អាយុ១៦ឆ្នាំ មុខរបរសិស្ស ស្នាក់នៅផ្ទះគ្មានលេខ ភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ ។
ទី២ ឈ្មោះ រ៉ា វណ្ណឆាណុត ភេទប្រុស អាយុ១៦ឆ្នាំ មុខរបរសិស្ស ស្នាក់នៅផ្ទះ៦៥ ផ្លូវ៩៧ ភូមិ៥ សង្កាត់ផ្សារដើមថ្កូវ ខណ្ឌចំការមន។
ទី៣ ឈ្មោះ កែ ធិតាកិត្យា ភេទប្រុស អាយុ១៥ឆ្នាំ មុខរបរសិស្ស ស្នាក់នៅផ្ទះជួល ភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ ។
ទី៤ ឈ្មោះ ជា សុវណ្ណារ៉ា ភេទប្រុស អាយុ១៦ឆ្នាំ មុខរបរសិស្ស ស្នាក់នៅផ្ទះលេខ៣៤០ ផ្លូវ៣៧០ សង្កាត់បឹងកេងកង១ ខណ្ឌចំការមន។
និងទី៥. ឈ្មោះ ប៉ែត ដារ៉ា ភេទប្រុស អាយុ១៧ឆ្នាំ មុខរបរសិស្ស ស្នាក់នៅផ្ទះជួលសង្កាត់ស្ទឹងមានជ័យ២ ខណ្ឌមានជ័យ ឆក់២លើកក្នុងសង្កាត់ទន្លេបាសាក់ ខណ្ឌចំការមនទី១ នៅស្ពានភ្លោះកោះពេជ្រ អត់បានសម្រេចទូរស័ព្ទទី២ស្ពានឥន្ធូ អត់សម្រេច ។
ចំណែកស្ត្រីរងគ្រោះមានឈ្មោះ Pustova Olha អាយុ២៨ឆ្នាំ ជនជាតិអ៊ុយក្រែន ស្នាក់នៅសណ្ឋាគារហ្គូអ៊ីង ភូមិ៥ ក្រុម២៩ សង្កាត់បឹងកេងកង១ ខណ្ឌចំការមន ។
សូមជម្រាបផងដែរថា កម្លាំងព្រហ្មទណ្ឌខណ្ឌ សហការជាមួយកម្លាំងនគរបាលប៉ុស្តិ៍ បានល្បាតក្នុងមូលដ្ឋាន ដើម្បីបង្ការបទល្មើសឆក់លួចហើយក៏ប្រទះឃើញជនសង្ស័យ៤នាក់ ជិះម៉ូតូម៉ាកម៉ូតូស៊ុយស៊ូគីលេត ពណ៌ស ពាក់ស្លាកលេខ ភ្នំពេញ 1CK 9769 និងម៉ូតូសង់ប៊ិច ពណ៌ខ្មៅ ពាក់ស្លាកលេខ ភ្នំពេញ 1CD 3588 ធ្វើសកម្មភាពឆក់ទូរស័ព្ទពីស្ត្រីជនបរទេសម្នាក់ ដែលកំពង់ជិះម៉ូតូកង់បី ដៃកាន់ទូរស័ព្ទ ឆក់រួចជនសង្ស័យព្យាយាម បើករត់គេចខ្លួន តែកម្លាំងនគរបាលដេញតាមចាប់បាននៅផ្លូវសហព័ន្ធរស្ស៊ី ចាប់បានជនសង្ស័យ២នាក់ នាំមកស្នាក់ការប៉ុស្តិ៍សួរនាំ ។
ក្រោយពីសាកសួរនាំ សមត្ថកិច្ចនាំជនសង្ស័យស្វែងរកចាប់បក្ខពួកដល់ផ្ទះសំណាក់៣៤២ទៀត ដែលស្នាក់នៅបន្ទប់លេខ២១៦ និង២១៧ ជាន់ទី២ មានគ្នាចំនួន៧នាក់ទៀត (ស្រី២នាក់) ក្នុងនោះមានអ្នកពាក់ព័ន្ធតែប្រុស៣នាក់ទេ ក្រៅពីនេះមិនពាក់ព័ន្ធ សមត្ថកិច្ចអោយត្រលប់ទៅវិញ ហើយចំណែកជនសង្ស័យសរុប៥នាក់ និងម៉ូតូ២គ្រឿង ឃាត់ខ្លួនបញ្ជូលទៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងចាត់ការតាមផ្លូវច្បាប់ ៕