កណ្តាល ៖ មន្ត្រីនគរបាលក្រុងតាខ្មៅម្នាក់ដេកពេទ្យ និងនាយរងការិយាល័យចរាចរណ៍ជើងគោកម្នាក់ ត្រូវឃាត់ខ្លួនទៅសាកសួរ ក្នុងជម្លោះផឹកស៊ី ក្លែមសម្តីរហូតក្លាយជាហិង្សាប្រតាយប្រតប់គ្នា បង្កឱ្យភ្ញាក់ផ្អើលនៅហាងមួយ ក្នុងក្រុងតាខ្មៅ ។
ហេតុការណ៍ហិង្សាវាយតប់គ្នាក្នុងហាងផឹកស៊ីនេះ បានកើតឡើងកាលពីរសៀលថ្ងៃទី២០ មេសា ២០១៩ នៅចំណុចហាងជំនោធម្មជាតិភូមិក្រពើហាកើត សង្កាត់ព្រែកឬស្សី ក្រុងតាខ្មៅ ខេត្តកណ្តាល ។
ប្រភពព័ត៌មានបានឲ្យដឹងថា ជនរងគ្រោះ គេស្គាល់ថា ជានាយរងប៉ុស្តិ៍តាខ្មៅ មានឈ្មោះ ស៊ាង រិទ្ធី អាយុ៣៧ឆ្នាំ មានទីលំនៅភូមិព្រែកសំរោង សង្កាត់តាខ្មៅ ក្រុងតាខ្មៅ ។ ចំណែកជនបង្ក ឈ្មោះ ខៀវ ប៊ុនធឿន ភេទប្រុស អាយុ៣៧ឆ្នាំ មានទីលំនៅភូមិតាខ្មៅ សង្កាត់តាខ្មៅ ក្រុងតាខ្មៅ មានមុខរបរនាយរងការិយាល័យចរាចរណ៍ជើងគោក ។
ប្រភពព័ត៌មានពីកន្លែងកើតហេតុ បានប្រាប់អោយដឹងថា មុនពេលកើតហេតុ គេឃើញជនរងគ្រោះ និងជនបង្ក រួមជាមួយមិត្តភក្តិចំនួន៦នាក់ទៀត បាននាំគ្នា ទៅផឹកស៊ី នៅក្នុងហាង «ជំនោធម្មជាតិ» លុះពេលផឹក ABC អស់ម្នាក់ជិត១០កំប៉ុង ក៏ស្រាប់តែជនរងគ្រោះ និងមិត្តភ័ក្រម្នាក់ឈ្មោះ ឆៃ យ៉ា បានទាស់ពាក្យសំដីគ្នារឿងផឹកតិច ផឹកច្រើន ពេលនោះមិត្តភ័ក្រម្នាក់ ក៏បានចាប់ទាញជនរងគ្រោះចេញទៅក្រៅកញ្ចុះ ហើយជនបង្កក៏ចេញមកតាម ហើយមកហាមជនរងគ្រោះកុំឱ្យឈ្លោះប្រកែកគ្នាអី ខ្មាស់គេ ។ ដោយសារតែអំណាចទឹកប្តូរនិស័យចូលខ្លួន លែងស្តាប់គ្នាបាន ក៏ធ្វើឱ្យស្ថានការណ៍ កាន់តែធ្ងន់ៗទៅ រហូតផ្ទុះហិង្សាដាក់គ្នាប្រតាយប្រតប់គ្នា បណ្តាលឱ្យជនរងគ្រោះត្រូវរបួសត្រង់លើភ្នែកខាងឆ្វេង និងក្រោមភ្នែកខាងឆ្វេង ។
ក្រោយកើតហេតុជនរងគ្រោះ ត្រូវបានគេបញ្ជូនទៅកាន់មន្ទីរពេទ្យភ្លាមៗ ចំណែកជនបង្ក ត្រូវបានឃាត់ខ្លួននាំយកទៅសាកសួរផងដែរ ។ ទោះជាយ៉ាងណា អ្នកសារព័ត៌មានយើងនៅមិនទាន់ដឹងថា តើចំណាត់យ៉ាងណានោះទេ ចំពោះនគរបាលខេត្តកណ្តាល ឈ្លោះវាយគ្នាបែបនេះ ៕
