ភ្នំពេញ ៖ ក្រសួងធនធានទឹក និងឧតុនិយម កាលពីថ្ងៃទី១៨ មេសា ២០១៩ កន្លងមក បានចេញសេចក្តីជូនដំណឹង ស្តីពីការព្យាករណ៍ស្ថានភាពអាកាសធាតុនៅកម្ពុជាហើយថា ចាប់ពីថ្ងៃទី១៨ ដល់ថ្ងៃទី២៤ ខែមេសា ឆ្នាំ២០១៥ អាកាសធាតុក្តៅនឹងបន្តកើនឡើងខ្ពស់ចន្លោះពី៣៧-៤០អង្សាសេ ។
មិនទាន់ផុតផង នៅព្រឹកថ្ងៃទី២២ ខែមេសា ឆ្នាំ២០១៩នេះ ក្រសួងធនធានទឹក និងឧតុនិយម បានចេញសេចក្តីជូនដំណឹងថ្មីទៀត អោយដឹងផងដែរថា ដោយសារបាតុភូតអ៊ែលនីណូ (El Nino) នៅតែមានឥទ្ធិពល ហើយនឹងបន្ដគ្របដណ្ដប់លើប្រមាណពាក់កណ្ដាលនៃភពផែនដី ដូច្នេះនៅតំបន់មួយចំនួន និងប្រទេសកម្ពុជា ក៏នៅតែបន្តទទួលរងឥទ្ធិពលនេះដែរ ហើយកត្តានេះធ្វើឲ្យសីតុណ្ហភាពអតិបរមា នៅកម្ពុជា បន្តកើនឡើង នឹងអាចឈានទៅដល់៤០-៤១ អង្សាសេ ក្នុងសប្តាហ៍នេះ ។
យោងតាមសេចក្តីជូនដំណឹងដដែល បានបង្ហាញថា ស្ថានភាពភ្លៀងកាន់តែខ្សោយ ប៉ុន្តែបាតុភូតរន្ទះ និងខ្យល់កន្ត្រាក់ កើតឡើងញឹកញាប់ នឹងមានឥទ្ធិពលខ្លាំង ដូចនេះសូមអំពាវនាវឲ្យមានការប្រុងប្រយ័ត្ន ចំពោះបាតុភូតទាំងពីរនេះ ។ ទន្ទឹមនេះ សូមបងប្អូនប្រជាពលរដ្ឋ ត្រូវយកចិត្តទុកដាក់ចំពោះសុខភាព ដែលអាចមានការប៉ះពាល់ ដោយសារការកើនឡើងនៃកម្ដៅនេះ ។
ទោះជាយ៉ាងនេះក្តី ក្រសួងធនធានទឹក និងឧតុនិយម ក៏បានបញ្ជាក់ផងដែរថា កម្ដៅដោយសារឥទ្ធិពល បាតុភូតអ៊ែលនីណូនេះ នឹងថយកម្ដៅទៅវិញនៅអំឡុងសប្ដាហ៍ទី៣ នៃខែឧសភា ឆ្នាំ២០១៩ នៅប្រទេសកម្ពុជា ៕
