ខេត្តកោះកុង ៖ អ្នកលក់ទឹកអំពៅម្នាក់ កំពុងកិនអំពៅលក់សុខៗ ស្រាប់តែក្មេងស្រីម្នាក់ មិនដឹងយ៉ាងម៉េចរុញដៃចូលម៉ាស៊ីន បណ្តាលឱ្យកិនជាប់ដៃម្ខាង រងរបួសធ្ងន់ បង្កឱ្យមានការភ្ញាក់ផ្អើលឡើងកាលពីវេលាម៉ោងជិត១រសៀល ថ្ងៃទី២២ ខែមករា ឆ្នាំ២០១៩ នេះនៅចំណុចគល់ស្ពានខេត្តកោះកុង ។
បើតាមប្រភពពី ហ្វេសប៊ុកមួយមានឈ្មោះថា បងថារី សាន់ អេសស៊ី បានបង្ហោះវីដេអូ និងរូបភាព យ៉ាងដូច្នេះថា ៖ «21.01.2019 ម៉ោង១២ថ្ងៃត្រង់ ((គល់ស្ពានកោះកុង)) អាណិតណាស់ព្រះអើយ ពេលឃើញផ្ទាល់ភ្នែក បានដឹងថាវាឈឺចាប់ប៉ុនណា ក្មួយស្រីយំអោបខ្ញុំ ។ មុននេះបន្តិច ខ្ញុំបានជិះកាត់តាមផ្លូវរង្វង់មូលគល់ស្ពានកោះកុង ខ្ញុំបានឃើញក្មួយស្រីម្នាក់ កំពុងជាប់ដៃចូលក្នុងម៉ាស៊ីនកិនទឹកអំពៅ ពួកខ្ញុំក៏បានចូលទៅជួយគាស់ ទំរាំបានចេញ ពួកខ្ញុំត្រូវប្រើពេលអស់ជាងកន្លះម៉ោង ហើយពេលនេះខ្ញុំ អរគុណបងប្អូន ដែលចូលមកជួយគ្នាដោយជោគជ័យ ហើយខ្ញុំក៏ប្រាប់បងម៉ូតូឌុប ដើម្បីយកគាត់ទៅពេទ្យជាបន្ទាន់» ។
យ៉ាងណា ក្មេងស្រីរងគ្រោះដែលជាប់ដៃក្នុងម៉ាស៊ីនកិនទឹកអំពៅ នៅមិនទាន់ស្គាល់អត្តសញ្ញាណនៅឡើយទេ ៕