កំពង់ចាម+ក្រចេះ ៖ ទឹកទន្លេមេគង្គ បានហក់ឡើងជាងកន្លះម៉ែត្រ នៅថ្ងៃទី២១ ខែមករា ឆ្នាំ២០១៩ គឺទឹកឡើងខុសរដូវ បានធ្វើឲ្យស្ពានប្រដឹសឬស្សីកោះប៉ែន ក្នុងទីរួមខេត្តកំពង់ចាម បានរបើកដាច់ដោយកង់ និងរោងក្យូសផ្ទះទឹកនៅតំបន់រមណីយដ្ឋានកាំពី ត្រូវទឹកជន់លិចយ៉ាងគំហុក ។
ទឹកទន្លេមេគង្គ ឡើងខុសធម្មតា នាពេលនេះ ត្រូវបានគេបញ្ជាក់ថា ដោយសារតែភ្លៀងធ្លាក់ នៅក្នុងប្រទេសឡាវ ដល់កម្រិតជាង៤០មីលីម៉ែត្រ និងធ្វើឲ្យទឹកទន្លេនៅក្នុងប្រទេសឡាវ ហក់ឡើងខ្ពស់ជាងកម្ពស់ទឹកធម្មតា ប្រមាណជា ២,៦០ម៉ែត្រ ពោលគឺមិនមែនដោយសារការបើកទ្វារទឹករបស់វារីអគ្គិសនីណាមួយនៅកម្ពុជាទេ ។
ទឹកទន្លេមេគង្គហក់ឡើងខុសប្រក្រតី បានធ្វើឲ្យស្ពានប្រដឹសឬស្សី សម្រាប់អ្នទេសចរ ឆ្លងពីក្រុងកំពង់ចាម ទៅឆ្នេរខ្សាច់កោះប៉ែន ដាច់ខូចអស់ប្រវែងប្រមាណជា ១០០ម៉ែត្រ ។ ទឹកទន្លេមេគង្គ បានឡើងជាលំដាប់ប្រហែលមួយសប្តាហ៍សរុបទឹកឡើងប្រហែល០,៨០ម៉ែត្រ ធ្វើឲ្យលិចស្ពាននៅកន្លែងខ្លះ មុននឹងដាច់ ។
ជាមួយគ្ននេះដែរ នៅឯខេត្តក្រចេះវិញ រោងក្យូសផ្ទះទឹកប្រមាណជាង៥០០រោងក្យូសផ្ទះ នៅតំបន់រមណីយដ្ឋានទឹកជួរទន្លេមេគង្គកាំពី ស្ថិតនៅក្នុងឃុំសំបុកស្រុកចិត្របុរី ជាទីសម្រាប់ទទួលភ្ញៀវទេសចរណ៍ក្នុងរដូវប្រាំងធ្លាក់ខ្យល់នេះត្រូវបានទឹកជំនន់នារដូវប្រាំងជន់លិចយ៉ាងគំហុក កាលពីល្ងាចថ្ងៃទី២០ មករារហូតដល់ព្រឹកថ្ងៃទី២២ មករា នេះនៅមិនទាន់ស្រកទេ ។
ការជន់ឡើងនៃជំនន់ទន្លេនារដូវប្រាំងនេះបានធ្វើឱ្យមានការភ្ញាក់ផ្អើល ដល់ពលរដ្ឋនៅតាមបណ្តោយដងទន្លេមេគង្គពួកគាត់ចាត់ទុកថាជាបម្រែបម្រួលអាកាសធាតុដែលពុំធ្លាប់ ជួបប្រទះ។ ព្រោះថារដូវប្រាំងជារដូវទឹកស្រកតែឆ្នាំនេះរដូវប្រាំងបែជាមានទឹកជំនន់ទៅវិញ ។
ពាក់ពន្ធ័ទៅនឹងការជន់ឡើងខុសប្រក្រតីនៃទឹកទន្លេមេគង្គនេះ មន្ត្រីជំនាញជលសាស្ត្រ របស់ក្រសួងធនធានទឹក និងឧតុនិយម បានបញ្ជាក់ថា ទឹកទន្លេមេគង្គ នៅខេត្តកំពង់ចាម បានហក់ឡើងខ្ពស់ជាងពេលធម្មតា ប្រមាណជាកន្លះម៉ែត្រ មិនមែនដោយសារការបើកទ្វារទឹករបស់វារីអគ្គិសនីណាមួយនៅកម្ពុជាទេ គឺដោយសារមានភ្លៀងធ្លាក់ដល់កម្រិត ៤៣មីលីម៉ែត្រ នៅក្នុងប្រទេសឡាវ ។ ភ្លៀងនេះ បានធ្វើឲ្យទឹកទន្លេនៅស្ថានីយលួងប្របាងឡើងខ្ពស់ជាងធម្មតា ដល់ទៅ ២,៦០ម៉ែត្រ កាលពីជាមួយសប្តាហ៍មុន ។
មន្ត្រីជំនាញ ក៏បានប្រកាសថា ទឹកទន្លេមេគង្គ នៅខេត្តកំពង់ចាម អាចឡើងថែមបន្តិចទៀត មុនស្រកទៅវិញ។ នៅថ្ងៃទី២១ ខែមករានេះ ទឹកមានកម្ពស់ ៤,៥៥ម៉ែត្រ ។ ស្ថានភាពជន់ឡើង គឺនៅតែបន្តជន់ឡើងជាប្រចាំដោយមិនថមថយនោះទេ អ៊ីចឹងទេសូមប្រជាពលរដ្ឋត្រូវមានការប្រុងប្រយ័ត្ន ៕
