រាជធានីភ្នំពេញ ៖ សេចក្តីរាយការណ៍បឋម បានឱ្យដឹងថា នៅព្រឹកថ្ងៃទី២១ មករា ២០១៩នេះ កម្លាំងនគរបាលខណ្ឌពោធិ៍សែនជ័យ បានបើកប្រតិបត្តិការបង្ក្រាបក្រុមជនសង្ស័យមួយសំបុក មានគ្នា៨នាក់ ជំនាញឆក់កាបូបភ្ញៀវបរទេស នៅចំណុចមុខព្រលានយន្តហោះអន្តរជាតិភ្នំពេញ និងខណ្ឌសែនសុខ រួមទាំងវត្ថុតាងមួយចំនួនធំ ។
សេចក្តីរាយការណ៍បន្តថា វេលាម៉ោង៩ និង៣០នាទីព្រឹកថ្ងៃទី២១ មករា នេះ កម្លាំងជំនាញចេញល្បាតពួនស្ទាក់ចាំឃ្លាំមើល ក៏ប្រទះឃើញក្រុមជនសង្ស័យមានគ្នា៣នាក់ ជិះម៉ូតូម៉ាកហុងដាឌ្រីមសេ១២៥មួយគ្រឿង និងម៉ាកស៊ុយហ្ស៊ុយគីលែត១គ្រឿង បម្រុងធ្វើសកម្មភាពឆក់កាបូប របស់ជនជាតិចិនម្នាក់ ភ្លាមនោះ កម្លាំងសមត្ថកិច្ចក៏បើកប្រតិបត្តិការបង្ក្រាប ចាប់បានជនសង្ស័យម្នាក់ភ្លាមៗ ។
បន្ទាប់ពីសមត្ថកិច្ចជំនាញចាប់បានម្នាក់ ហើយបក្ខពួក២នាក់ទៀត ជិះម៉ូតូហុងដាឌ្រីមរត់គេចខ្លួនបាត់ ។ កម្លាំងនគរបាល រួមមានកម្លាំងព្រហ្មទណ្ឌ កម្លាំងសន្តិសុខ និងកម្លាំងអន្តរាគមន៍ ក៏បានឲ្យជនសង្ស័យម្នាក់ដែលឃាត់ខ្លួនបាន នាំបន្តតាមទៅរកសំបុក រហូតឃាត់ខ្លួនបានជនសង្ស័យចំនួន៧នាក់ទៀត (ស្រីចំនួន៣នាក់) ដែលជាបក្ខពួកនៅចំណុចបន្ទប់ជួលជិតរោងចក្រC7 ស្ថិតក្នុងភូមិដីថ្មី សង្កាត់គោកឃ្លៀង ខណ្ឌសែនសុខ រាជធានីភ្នំពេញ ។ ព្រមទាំងដកហូតបានកាបូបជាច្រើនទៀត ដែលក្រុមនេះឆក់បាននាពេលកន្លងមក ។
កាបូបដ៏ច្រើនដែលត្រូវចោរឆក់ពីអ្នកដំណើរតាមផ្លូវ ជាពិសេសឆក់ពីជនបរទេសនោះ ត្រូវបានកម្លាំងនគរបាលខណ្ឌពោធិ៍សែនជ័យរកឃើញ នៅក្នុងបន្ទប់ជួល ខណៈពេលដែលកម្លាំងចូលទៅចាប់ខ្លួនមនុស្សប្រុស-ស្រី៧នាក់ ជាក្រុមមុខសញ្ញាចោរឆក់យ៉ាងសកម្មបំផុត ដែលតែងធ្វើសកម្មភាពឆក់មុខអាកាសយានដ្ឋានអន្តរជាតិ-ភ្នំពេញ ។
ទោះជាយ៉ាងនេះក្តី កម្លាំងជំនាញបាននិងកំពុងតាមចាប់បក្ខពួកក្រុមដៃស្អិតទាំងនេះ ដែលនៅសល់បន្ថែមទៀត ដែលកំពុងតែរត់គេចខ្លួន ដើម្បីយកផ្តន្ទាទោសតាមផ្លូវច្បាប់ ៕
