រាជធានីភ្នំពេញ ៖ ប៉ូលិសប្រឆាំងគ្រឿងញៀនក្រសួងមហាផ្ទៃ កាលវេលាម៉ោង១២ និង១៥នាទីរំលងអធ្រាត្រ ឈានចូលថ្ងៃទី១៩ ខែមករា ក្រោមការសម្របសម្រួលពីស្ថាប័នអយ្យការសាលាដំបូងរាជធានីភ្នំពេញ រួមទាំងអាជ្ញាធរមូលដ្ឋាន បានឆ្មក់ចូលបង្ក្រាបទីតាំងខារ៉ាអូខេមួយកន្លែង ដែលពោរពេញទៅដោយបទល្មើស ប្រើប្រាស់ចែកចាយនិងជួញដូរគ្រឿងញៀន ដោយឃាត់ខ្លួនមនុស្សប្រុសស្រីចំនួន៥៨នាក់ ។
ប្រតិបត្តិការបង្ក្រាបនេះ គឺជាការបង្ក្រាបលើកទី២ នៅខារ៉ាអូខេ PRO KTV ដែលមានទីតាំងស្ថិតនៅផ្ទះលេខ៧៥៧-៧៥៨ ភូមិ៧ សង្កាត់បឹងត្របែក ខណ្ឌចំការមន ។
មន្ត្រីជាន់ខ្ពស់នៃមន្ទីរប្រឆាំងគ្រឿងញៀន បានប្រាប់អ្នកសារព័ត៌មានយើងឲ្យដឹងថា សមត្ថកិច្ចបានឃាត់ខ្លួនមនុស្សប្រុសស្រីចំនួន៥៨នាក់ (ស្រី២៤នាក់) មាន៥ជាតិសាសន៍ ក្នុងនោះជនជាតិចិន២៩នាក់ (ស្រី៥នាក់) ជនជាតិវៀតណាម២៣នាក់ (ស្រី១៥នាក់) ស្ត្រីជនជាតិថៃ២នាក់ ស្ត្រីខ្មែរ២នាក់ និងបុរសកូរ៉េម្នាក់ ។ ជនសង្ស័យ៥២នាក់វិជ្ជមាន (មានជាប់សារធាតុញៀន) និងអវិជ្ជមាន០៦នាក់ (មិនមានប្រើប្រាស់) ។
មន្ត្រីសមត្ថកិច្ច បន្តថា ជនដែលសមត្ថកិច្ចចាប់ឃាត់ខ្លួនបានបែងចែកជាប្រភេទ ៖ ១-អនុប្រធានក្រុមហ៊ុនម្នាក់ ជាម្ចាស់ទីតាំង ។ ២-មេការធំម្នាក់ និងមេការតូចម្នាក់ ជាអ្នកចាត់ចែងទូទៅនៅក្នុងក្លិបកម្សាន្តខារ៉ាអូខេ ។ ៣-អ្នកប្រើប្រាស់គ្រឿងញៀន៥៣នាក់ និងអ្នកកំដរ២នាក់ ។ ចំពោះវត្ថុតាងដែលត្រូវបានដកហូតមាន ថ្នាំញៀនប្រភេទ អ៊ិចស្តាស៊ីគ្រាប់ទម្ងន់២,០៥ក្រាម ថ្នាំញៀនម្សៅប្រភេទកេតាមីន៦,៥៨ក្រាម និងថ្នាំញៀនម្សៅប្រភេទកាហ្វអ៊ិចស្តាស៊ី៩៧,០៨ក្រាម ។
ក្រោយពេលឃាត់ខ្លួន ជនពាក់ព័ន្ធនឹងករណីប្រើប្រាស់ ចែកចាយ និងជួញដូរគ្រឿងញៀនទាំងនោះ ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ។
គួរបញ្ជាក់ថា ទីតាំងខាងលើត្រូវបានសមត្ថកិច្ចបង្ក្រាបម្តងរួចមកហើយ កាលពីថ្ងៃទី១៨ ខែកញ្ញា ឆ្នាំ២០១៨ បានឃាត់ខ្លួនមនុស្ស១៧នាក់ (ស្រី៣) ក្នុងនោះ អ្នកជួញដូរ២នាក់ និងអ្នកប្រើប្រាស់១៥នាក់ (ស្រី៣នាក់) និងបានចាប់យកវត្ថុតាងថ្នាំញៀនប្រភេទខេតាមីន ៣០គ្រាប់ និងម៉េតំហ្វេតាមីន ICE ១៨កញ្ចប់តូចទៀតផង ៕