ភ្នំពេញ ៖ កម្លាំងនាយកដ្ឋានប្រឆាំងការជួញដូរមនុស្សនិងការពារអនីតិជន បានឆ្មក់ចូលបង្ក្រាបហាងម៉ាស្សាកោសជប់ធ្វើសរសៃមួយកន្លែង មានលួចបង្កប់សេវាផ្លូវភេទ ដោយឃាត់ខ្លួនមនុស្សចំនួន៧នាក់ និងដកហូតវត្ថុតាងមួយចំនួន។
ការបង្ក្រាបហាងម៉ាស្សានេះ ធ្វើឡើងកាលពីយប់ថ្ងៃទី១៩ខែកញ្ញា ឆ្នាំ២០១៨ ត្រង់ចំណុចផ្ទះលេខ៣៦០EoE តាមបណ្ដោយផ្លូវ២០១១ ភូមិដីថ្មី សង្កាត់គោកឃ្លាង ខណ្ឌសែនសុខ ។
ទីតាំងលួចលាក់បង្កប់សេវាកម្មផ្លូវភេទខាងលើនេះ កម្លាំងចុះឆែកឆេរ និងឃាត់ខ្លួនមនុស្សចំនួន៧នាក់ ក្នុងនោះឃាត់ខ្លួនប្តីប្រពន្ធដែលជាថៅកែហាងម៉ាស្សនោះ ដែលបុរសជាប្តីមានឈ្មោះ ម៉ុន ចំរើន អាយុ៤១ឆ្នាំ ស្នាក់នៅកន្លែងកើតហេតុ ប្រពន្ធឈ្មោះ ហ៊ុន ស្រីអន អាយុ២១ឆ្នាំ ស្នាក់នៅជាមួយគ្នា ។
ចំណែកឯនារីម៉ាស្សាចំនួនប្រាំនាក់ទៀត ជាជនរងគ្រោះ រួមទាំងដកហូតបានវត្ថុតាងរួមមានឧបករណ៍ប្រើប្រាស់គ្រឿងញៀន ចំនួន៤ ស្រោមអនាម័យប្រើប្រាស់រួច និងមិនទាន់ប្រើ មួយចំនួន និងសម្ភារមួយចំនួនទៀត ។
បច្ចុប្បន្ន ថៅកែ២នាក់ប្តីប្រពន្ធនិងស្ត្រីម៉ាស្សាទាំង៥នាក់ រួមទាំងវត្ថុតាង ត្រូវបានកម្លាំងសមត្ថកិច្ចនាំខ្លួនយកទៅសាកសួរនៅឯនាយកដ្ឋានប្រឆាំងការជួញដូរមនុស្ស និងការពារអនីតិជន ដើម្បីរង់ចាំធ្វើការចាត់ការបន្ត ទៅតាមនីតិវិធីច្បាប់ ៕
