ភ្នំពេញ ៖ ក្រសួងអប់រំយុវជន និងកីឡា បានចេញមុខសុំទោសទៅកាន់បេក្ខជន មាតាបិតា អាណាព្យាបាលសិស្ស និងអ្នកពាក់ព័ន្ធ ចំពោះកំហុស ដែលក្រសួងអះអាងថា កើតឡើងដោយសារកម្មវិធីកុំព្យូទ័រ នៅក្នុងពេលដំណើរការបូកសរុបពិន្ទុបេក្ខជនប្រឡងបាក់ឌុប មិនបានបូកស្រង់ពិន្ទុមុខវិជ្ជាគណិតវិទ្យារបស់បេក្ខជនចំនួន៧៤០បន្ទប់ ។
ការសុំទោសនេះ ធ្វើឡើងតាមរយៈ លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡា ដោយលោកប្រាប់ថា កំហុសនេះ ក្នុងនាមថ្នាក់ដឹកនាំក្រសួងអប់រំ លោករដ្ឋមន្ត្រី ហង់ ជួនណារ៉ុន បានផ្ដាំសុំទោសបេក្ខជនប្រឡង មាតាបិតា អាណាព្យាបាល និងអ្នកពាក់ព័ន្ធទាំងអស់ ក្នុងករណីនេះ ។ យើងមិនចង់ឱ្យមានបញ្ហានេះទេ ។ វាកើតឡើងព្រោះបច្ចេកទេសកំព្យូទ័រ តែទោះជាយ៉ាងណា យើងបានប្រជុំ ដើម្បីមិនឱ្យមានបញ្ហានេះកើតឡើងទៀតឡើយ ។
ក្រសួង ក៏បានធ្វើការយ៉ាងសកម្ម និងបានប្រជុំបន្ទាន់ជាបន្តបន្ទាប់ ដើម្បីធានាថា ការប្រឡងដំណើរការ ទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន ៕
