ខេត្តកណ្តាល ៖ កាលពីព្រឹកថ្ងៃទី១៤ កញ្ញា ២០១៨ នេះតុលាការខេត្តកណ្តាលបានបើកសវនាការ លើសំណុំរឿងកូនស្រីកាប់សម្លាប់ឪពុក ដោយសារបាត់លុយ៣,០០០រៀល ត្រូវតុលាការប្រកាសសាលក្រមផ្តន្ទាទោសដាក់ពន្ធនាគារ ចំនួន១២ឆ្នាំ ។
ជនជាប់ចោទ ឈ្មោះ ឃុត ចន្នី ភេទស្រី អាយុ៣៧ឆ្នាំ ជនជាតិខ្មែរ មុខរបរកសិករ មានទីលំនៅភូមិល្វាសរកណ្តាល ឃុំល្វាសរ ស្រុកល្វាឯម ខេត្តកណ្តាលត្រូវបានតុលាការខេត្តកណ្តាល សម្រេចចេញដីកាឃុំខ្លួនដាក់ពន្ធនាគារខេត្ត ។
សូមរម្លឹកថា ហេតុការណ៍កាប់សម្លាប់យ៉ាងសាហាវឃោរឃៅនេះ បានកើតឡើងនៅថ្ងៃទី៥ ខែមេសា ឆ្នាំ២០១៨ វេលាម៉ោង១៦និង៣០នាទី នៅចំណុចផ្ទះជនរងគ្រោះ ឈ្មោះ ឯម សារឿន ភូមិល្វាសរកណ្តាល ឃុំល្វាសរ ស្រុកល្វាឯម ខេត្តកណ្តាល ដោយកូនស្រីបានលើកដៃកាប់សម្លាប់ឪពុកខ្លួនឯង ដោយសារខឹងបាត់លុយ៣,០០០រៀល ដោយចោទថាឪពុកខ្លួនជាអ្នកលួចលុយនោះ ។
សូមបញ្ជាក់ថា ឃុត ចន្នី ត្រូវជាប់ចោទពីបទ«ឃាតកម្ម» ប្រព្រឹត្តនៅភូមិល្វាសរកណ្តាល ឃុំល្វាសរ ស្រុកល្វាឯម ខេត្តកណ្តាល កាលពីថ្ងៃទី៥ ខែមេសា ឆ្នាំ២០១៨ តាមមាត្រា១៩៩ នៃក្រមព្រហ្មទណ្ឌ ៕