ភ្នំពេញ៖ បន្ទាប់ពីបណ្ដាញសារព័ត៌មានមួយចំនួនបានចុះផ្សាយពីលោក ស ថេត ស្នងការនគរបាលរាជធានីភ្នំពេញ ដែលទើបនឹងឡើងកាន់តំណែងថ្មី ថាត្រូវជាប្អូនបង្កើតរបស់សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នោះមក សម្ដេចបានបកស្រាយតាមបណ្ដាញសង្គមថា លោក ស ថេត មិនមែនជាប្អូនបង្កើតរបស់សម្តេចទេ។
ការដែលសម្ដេចក្រឡាហោម ស ខេង បានចេញមកបកស្រាយតាមបណ្ដាញសង្គមហ្វេសប៊ុកនេះ គឺកើតឡើង បន្ទាប់ពីបណ្ដាញសារព័ត៌មានជាច្រើន បានសរសេរពីការឡើងកាន់តំណែងរបស់លោក ស ថេត ស្នងការនគរបាលរាជធានីភ្នំពេញ ដែលទើបនឹងឡើងកាន់តំណែងជំនួសលោក ជួន សុវណ្ណ ត្រូវឡើងទៅកាន់តំណែងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន។
យោងតាមគេហទំព័រហ្វេសប៊ុករបស់សម្ដេចក្រឡាហោម ស ខេង បានសរសេរថា មានអ្នកសារព័ត៌មានជាច្រើន បានចេញផ្សាយអំពីការផ្ទេរតំណែង និងការប្រគល់ភារកិច្ច ជាស្នងការនគរបាលរាជធានីភ្នំពេញ ជូនលោក ស ថេត ។ សម្ដេចបន្តថា «អ្វីដែលខ្ញុំកត់សម្គាល់ និងចង់បញ្ជាក់នៅពេលនេះ គឺសារព័ត៌មានមួយចំនួនបានផ្សព្វផ្សាយថា លោកឧត្តមសេនីយ៍ ស ថេត គឺជាប្អូនបង្កើតរបស់ខ្ញុំ។ ខ្ញុំមិនដឹងថា សារព័ត៌មានទាំងនោះ បានប្រភពមកពីណា ឬក៏សន្និដ្ឋាន ដោយគ្មានប្រភពនោះទេ ប៉ុន្តែខ្ញុំសូមគូសបញ្ជាក់ថា លោកឧត្តមសេនីយ៍ ស ថេត មិនមែនជាប្អូនបង្កើតរបស់ខ្ញុំ ដូចអ្វីដែលសារព័ត៌មានមួយចំនួនបានផ្សព្វផ្សាយនោះឡើយ» ។
សូមរំឭកថា លោក ស ថេត ត្រូវបានប្រកាសចូលកាន់តំណែងជាស្នងការនគរបាលរាជធានីភ្នំពេញថ្មី កាលពីរសៀល ថ្ងៃទី១១ កញ្ញា ជំនួសលោក ជួន សុវណ្ណ អតីតស្នងការនគរបាលរាជធានីភ្នំពេញ ខណៈលោកត្រូវបានព្រះមហាក្សត្រចេញព្រះរាជក្រឹត្យ ត្រាស់បង្គាប់តែងតាំងលោកពីអនុរដ្ឋលេខាធិការក្រសួងមហាផ្ទៃ មកជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន មានឋានៈស្មើរដ្ឋមន្ត្រីជំនួស លោក កៅ ខុនដារ៉ា ដែលត្រូវទទួលភារកិច្ចថ្មី៕
