ភ្នំពេញ ៖ ហេតុការណ៍ភ្ញាក់ផ្អើលមួយបានកើតឡើងនាវេលាម៉ោង១រំលងអាធ្រាត ឈានចូលថ្ងៃទី២ ខែកញ្ញា ឆ្នាំ២០១៨ នៅចំណុចផ្លូវ៩៥ កែងនឹងផ្លូវម៉ៅសេទុង ដែលស្ថិតនៅក្នុងសង្កាត់បឹងត្របែក ខណ្ឌចំការមន ដោយរថយន្តកាមរីបាឡែន មួយគ្រឿង បានបើកគៀរម៉ូតូសង់ បណ្តាលអោយដួល ហើយចុះមកវាយពួកគេថែមទៀត ។
យោងតាមម្ចាស់រថយន្តម៉ាកកាមរីបាឡែន ពណ៌ស ដែលពាក់ស្លាកលេខ ភ្នំពេញ 2AG-4842 បានអះអាងថា មានយុវជនពីរនាក់ ជិះម៉ូតូហុងដាឌ្រីមសេ១២៥ ស៊េរីចាស់ ពណ៌ខ្មៅ ពាក់ស្លាកលេខ ភ្នំពេញ 1T-4331 ឌុបគ្នា បានយកដុំថ្ម គប់បំបែកកញ្ចក់រថយន្តខ្លួន ពីខាងក្រោយ បណ្តាលអោយបែក ហើយពួកគាត់(ស្រីម្នាក់ និងប្រុសម្នាក់) ក៏បើករថយន្ដដេញតាម ដោយការខឹង ពីចំណុចកន្លែងកើតហេតុ នៅតាមបណ្ដោយផ្លូវព្រះសីហនុ ស្ថិតនៅក្នុងសង្កាត់ចតុមុខ ខណ្ឌដូនពេញ រហូតមកដល់ចំណុចខាងលើ ក៏បើករថយន្តកាក់ពីមុខម៉ូតូ បណ្តាលអោយដួលហើយ ក៏កើតជាហិង្សា បាយបណ្ដាលឲ្យភាគីខាងម៉ូតូរងរបួសបែកចិញ្ចើមម្នាក់ ហូរឈាមស្រោចខ្លួន ។
ចំណែកឯភាគីខាងម៉ូតូវិញ បានអះអាងថា ពួកគេមិនបានដឹងរឿងអ្វីឡើយ ហើយក៏មិនមែនជាអ្នកគប់កញ្ចក់រថយន្តកាមរី អោយបែកនោះទេ ពួកគេទើបតែជិះម៉ូតូចេញពីកន្លែងកម្សាន្តកោះពេជ្រ ក៏ស្រាប់តែឃើញរថយន្តនោះ បើកដេញតាម ពួកគេ រហូតធ្វើឲ្យគ្នាពួកគេភ័យ ជិះម៉ូតូគេចដើម្បីរកកន្លែងមានសុវត្ថិភាព រហូតមកចំណុចខាងលើ ក៏ត្រូវរថយន្តកាមរីបាឡែន នោះបើកកៀរពួកបណ្តាលអោយដួលហើយចុះមកវាយពួកគេថែមទៀត ធ្វើឲ្យមានការភ្ញាក់ផ្អើលដល់កម្លាំងសមត្ថកិច្ចចុះអន្តរាគមន៍ទាំងយប់ ។
ក្រោយពីកើតហេតុប្រហែលជាជិត១ម៉ោង ទើបខាងសមត្ថកិច្ចជំនាញខណ្ឌចំការមន បានសហការគ្នាជាមួយនឹងសមត្ថកិច្ចប៉ុស្តិ៍ចតុមុខ ដើម្បីចុះមកនាំម្ចាស់រថយន្ត និងម្ចាស់ម៉ូតូយកទៅធ្វើការដោះស្រាយ ។ ហើយសមត្ថកិច្ចក៏បានយករថយន្តក៏ដូចជាម៉ូតូ ទៅរក្សាទុកនៅនគរបាលប៉ុស្តិ៍ចតុមុខ ដើម្បីដោះស្រាយតាមផ្លូវច្បាប់ ៕