ខេត្តបាត់ដំបង៖ ស្ត្រីវ័យក្មេងម្នាក់ទំនើងជាមានវិបត្តិផ្លូវចិត្តពីរឿងអ្វីមួយបានចុះទៅទឹក ប៉ុនប៉ងសម្លាប់ខ្លួន បង្កឲ្យភ្ញាក់ផ្អើលឡើង កាលពីវេលាម៉ោង២រសៀល ថ្ងៃទី២០ ខែសីហា ឆ្នាំ២០១៨ នៅត្រង់ចំណុចគល់ស្ពានថ្មចាស់ មុខសាលាខេត្តបាត់ដំបង។
ប្រភពព័ត៌មានពីកន្លែងកើតហេតុ បានឲ្យដឹងថា មុនដំបូង គេឃើញស្ត្រីម្នាក់ស្លៀកខោខាវប៊យ ពាក់អាវយឺត ពណ៌.ស និងមានស្ពាយកាបូបពីក្រោយ ដើរចុះទៅហែលទឹកស្ទឹងសង្កែ នៅត្រង់ចំណុចចុងស្ពានថ្មចាស់ត្រើយខាងកើត។ បើតាមការពិនិត្យមើល គឺនាងហាក់បីដូចជាមានរឿងអ្វីមួយកើតឡើង ហើយហែលតោងស្ពានទៅកន្លែងទឹកជ្រៅ ធ្វើឲ្យមនុស្សម្នាភ្ញាក់ផ្អើលឆោឡោយ៉ាងខ្លាំង ដោយគិតថា នាងព្យាយាមសម្លាប់ខ្លួន។ ឃើញបែបនេះ ប្រជាពលរដ្ឋនៅទីនោះបានស្រែកហៅនាងឲ្យឡើងមកលើគោកវិញ តែនាងមិនព្រមឡើងឡើយ ហើយបែរជានិយាយបណ្ដើរ សើចបណ្ដើរ និងឆ្លើយតមកវិញថា «ខ្ញុំគ្រាន់តែហែលទឹកលេងទេតើ»។
ប្រភពព័ត៌មានដដែល បានបន្តថា ដោយសារអ្នកដំណើរ និងប្រជាពលរដ្ឋនៅទីនោះ មើលឃើញពីសកម្មភាពរបស់ស្រ្ដីម្នាក់នេះ ហាក់បីដូចមនុស្សបែកថ្នាំផង ទើបពួកគាត់ស្រែកហៅនាងឲ្យឡើងមកលើគោកវិញ ពីព្រោះខ្លាចមានគ្រោះថ្នាក់ជាយថាហេតុ។ បើតាមមើល នាងរាងដូចជាខ្លាចទឹកជំនន់ ដែលកំពុងហូរយ៉ាងខ្លាំងទេ ទើបនាងឡើងមកលើស្ពានវិញ។ បន្ទាប់មក នាងបានឡើងមកដេកននៀល នៅលើស្ពាន ដោយនាងនិយាយបណ្ដើរ សើចបណ្ដើរ។ រីឯអ្នកខ្លះថា នាងស្រវឹង ហើយខ្លះទៀតថា នាងបែកថ្នាំ។
ប្រភពព័ត៌មានដដែល បានបន្តថា ដោយមើលឃើញស្ត្រីម្នាក់នេះកំពុងប្រឈមនឹងគ្រោះថ្នាក់បែបនេះ ទើបមានបុរសម្នាក់បានសម្រេចចិត្តចុះទៅក្នុងទឹក ចាប់អូសដៃនាងឡើងមកលើគោកវិញ ហើយនាងបានព្យាយាមប្រទាញប្រទង់មិនព្រមឡើងគោក តែដោយសារមិនអាចឈ្នឹងនះកម្លាំងរបស់បុរសនោះ ទើបនាងព្រមឡើងគោក។ បន្ទាប់មកប្រជាពលរដ្ឋបានសាកសួរពីអត្តសញ្ញាណរបស់នាង។ ប៉ុន្តែទោះជាមានគេសួរនាំយ៉ាងណា ក៏ស្ត្រីម្នាក់នេះមិនបានប្រាប់សាវតារ ឬកន្លែងស្នាក់នៅរបស់នាងទេ។ លុះពេលគេឆែកមើល នៅក្នុងកាបូបរបស់នាង ឃើញមានអត្តសញ្ញាណប័ណ្ណមួយសន្លឹក មាន ឈ្មោះ ជរ សុណាត អាយុ៣៤ឆ្នាំ រស់នៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង។ ស្រ្ដីម្នាក់នេះបាននិយាយប្រាប់អ្នកចោមរោមមើលនាងថា នាងមិនមែនចង់សម្លាប់ខ្លួនទេ គ្រាន់តែចង់ចុះហែលលេងតែប៉ុណ្ណោះ៕
