ហេតុការណ៍មួយ ដ៏គួរអោយរន្ធត់ នៅពេលដែលអ្នកសម្តែងបានដាក់ដៃចូលមាត់សត្វក្រពើ ភ្លាត់ស្នៀតត្រូវបានក្រពើវាយប្រហារ នៅចំពោះមុខទស្សនិកជនដែលកំពុងតែទស្សនាស្តីពីការសម្តែង នៅឯសួនសត្វមួយ កាលពីរសៀលថ្ងៃអាទិត្យ ទី២៩ កក្កដា ២០១៨ នេះបើតាមប្រភពព័ត៌មាន MailOnline ។
ប្រភពបន្តអោយដឹងថា ជនរងគ្រោះ ដែលត្រូវជា ឆ្មាំសួនសត្វ ក៏ដូចជា គ្រូបង្វឹកខាងលើ មានឈ្មោះថា តៅ អាយុ៤៥ឆ្នាំ នៅសួនក្រពើផុកកាថារ៉ា (Phokkathara) នៅខេត្តឈៀងរ៉ៃ ភាគខាងជើងប្រទេសថៃ នៅចំពោះមុខមនុស្សប្រហែល ១០០ នាក់ ។
គួរបញ្ជាក់ថា រឿងហេតុការណ៍ដ៏គ្រោះថ្នាក់ មួយនេះ បានកើតឡើងនៅពេលដែលមានការសម្តែង នូវសមត្តភាព ពិសេសពេលដែលគាត់បានលូកដៃចូលមាត់ក្រពើ ខណៈអ្នកបង្វឹកក្រពើម្នាក់ទៀតឈរមើល លោកតៅបានមើលទៅទស្សនិកជន រួចប្រាប់ទៅអ្នកប្រកាសតាមមេក្រូឱ្យបញ្ឈប់តន្ត្រី ស្រាប់តែក្រពើខាំដៃរបស់លោកតៅកន្ទ្រាក់យកៗតែម្តង ។
អ្នកបង្វឹកក្រពើរូបនេះបានស្រែកខ្លាំងៗ ឱ្យក្រពើលែងគាត់វិញ មុនពេលអាចគេចខ្លួនបានសម្រេច រួចរត់ចូលឆាកវិញជាមួយឈាមស្រក់ពេញឥដ្ឋការ៉ូសើម។
ទិដ្ឋភាពគួរឱ្យញាក់សាច់នេះត្រូវបានថត ដោយលោក ឃុន ភូសាវីត អាយុ ៣៥ ឆ្នាំ ដែលមកមើលកសិដ្ឋាន និងសួនក្រពើផុកកាថារ៉ានេះជាមួយប្រពន្ធរបស់គាត់ឈ្មោះ ណុក និងកូន២នាក់ ៕