Benny Chan តួ «ស៊ុនអ៊ូខុង» ពីតារាល្បីល្បាញធ្លាក់មកសម្តែងក្នុងភាពយន្តថវិកាតិចដោយសារតែរឿងអាស្រូវ

តារាសម្តែងហុងកុង Benny Chan ដែលធ្លាប់ទទួលបានប្រជាប្រិយភាពយ៉ាងខ្លាំងក្នុងទសវត្សរ៍ឆ្នាំ១៩៩០ តាមរយៈតួនាទីស៊ុនអ៊ូខុង ក្នុងរឿងភាគ «យុទ្ធសិល្ប៍ ស៊ុនអ៊ូខុង វគ្គ២» (Journey to the West II )កំពុងត្រូវបានលើកយកមកនិយាយជាថ្មី ពាក់ព័ន្ធនឹងការផ្លាស់ប្តូរទិសដៅអាជីពរបស់លោក ក្រោយរឿងអាស្រូវដែលបានប៉ះពាល់ដល់រូបភាពសាធារណៈកាលពីឆ្នាំ២០១១។

Benny Chan កើតនៅឆ្នាំ១៩៦៩ ហើយធ្លាប់ជាតារាសម្តែងប្រុសដែលមានប្រជាប្រិយភាពក្នុងវិស័យទូរទស្សន៍ហុងកុង។ ក្រៅពីតួនាទីស៊ុនអ៊ូខុង កាលពីឆ្នាំ១៩៩៨ លោកក៏ធ្លាប់សម្តែងក្នុងរឿងល្បីៗផ្សេងទៀត ដូចជា «Demi-Gods and Semi-Devils», «យុទ្ធសិល្ប៍កុមារណាចា»
(Gods of Honour) និង «ព្រះរស់ជីកុង»(The Legend of Crazy Monk)។ ស្នាដៃទាំងនេះបានជួយឱ្យលោកទទួលបានការគាំទ្រពីទស្សនិកជនជាច្រើននៅអាស៊ី។

តួនាទីស៊ុនអ៊ូខុងគឺជាស្នាដៃមួយដែលធ្វើឱ្យឈ្មោះ Benny Chan ល្បីល្បាញខ្លាំង។ លោកបានទទួលតួនាទីនេះបន្តពីតារាសម្តែង Dicky Cheung ហើយធ្លាប់ទទួលស្គាល់ថាការសម្តែងតួអង្គដែលទស្សនិកជនស្គាល់ច្បាស់រួចទៅហើយបានធ្វើឱ្យលោកមានសម្ពាធក្នុងការបំពេញតាមការរំពឹងទុករបស់អ្នកគាំទ្រ។ ទោះជាយ៉ាងណា ក្នុងឆ្នាំ២០១១ លោកបានជាប់ពាក់ព័ន្ធនឹងភាពចម្រូងចម្រាស បន្ទាប់ពីមានការចោទប្រកាន់ទាក់ទងនឹងអាកប្បកិរិយាមិនសមរម្យចំពោះតារាសម្តែងស្រី Rose Chan រួមជាមួយតារាសម្តែង Ma Tak-chung ក្នុងហេតុការណ៍មួយដែលត្រូវបានរាយការណ៍ថាពាក់ព័ន្ធនឹងគ្រឿងស្រវឹង។ ករណីនេះបានបង្កឱ្យមានការរិះគន់ជាច្រើនពីសាធារណជន ហើយ Benny Chan និងភរិយា Jiang Lisha បានចេញមុខសូមទោសជាសាធារណៈ។

ក្រោយហេតុការណ៍នេះ កេរ្តិ៍ឈ្មោះរបស់លោកបានរងផលប៉ះពាល់យ៉ាងខ្លាំង ហើយសារព័ត៌មានមួយចំនួនបានរាយការណ៍ថាឱកាសចូលរួមក្នុងផលិតកម្មធំៗរបស់លោកមានការថយចុះ។ បន្ទាប់មក លោកបានបន្តអាជីពសម្តែ ដោយចូលរួមក្នុងភាពយន្តចិនជាច្រើនដែលមានថវិកាផលិតមិនខ្ពស់ និងផលិតក្នុងរយៈពេលខ្លី។ Benny Chan បានចូលរួមក្នុងភាពយន្តប្រមាណ ២០ រឿងក្នុងរយៈពេលបីឆ្នាំចុងក្រោយ។ ទោះជាលោកនៅតែបន្តធ្វើការក្នុងវិស័យភាពយន្តក៏ដោយស្នាដៃទាំងនោះមិនទទួលបានការវាយតម្លៃខ្ពស់ពីអ្នករិះគន់ដូចស្នាដៃទូរទស្សន៍ដែលធ្លាប់ធ្វើឱ្យលោកល្បីល្បាញនោះទេ។

ក្រៅពីការសម្តែង លោកក៏ត្រូវបានរាយការណ៍ថាបានប្រើប្រាស់បណ្តាញសង្គម និងការផ្សាយផ្ទាល់ដើម្បីលក់ផលិតផល ជាប្រភពចំណូលបន្ថែមផងដែរ។ ទោះបីជាអាជីពរបស់ Benny Chan បានផ្លាស់ប្តូរពីសម័យកាលដែលលោកមានប្រជាប្រិយភាពខ្ពស់ក៏ដោយ ក៏តួនាទីស៊ុនអ៊ូខុង និងស្នាដៃរឿងភាគបុរាណរបស់លោកនៅតែជាការចងចាំសំខាន់សម្រាប់អ្នកគាំទ្ររឿងភាគហុងកុងជំនាន់មុន៕