អ្នកចូលចិត្តពិសារកាហ្វេ ត្រូវប្រយ័ត្នឲ្យមែនទែន! សមត្ថកិច្ចវៀតណាមទើបបង្ក្រាបកាហ្វេក្លែងក្លាយជាង ២០០គីឡូក្រាម ដែលផ្សំឡើងពីសណ្តែកសៀងលីងខ្លោច និងរសជាតិគីមីសិប្បនិម្មិត។ អ្នកជំនាញព្រមានថា វាផ្ទុកជាតិពុលបង្កជំងឺមហារីកក្រពះ និងពោះវៀនខ្ពស់បំផុត។
______________
ប្រយ័ត្នក្លាយខ្លួនជាជនរងគ្រោះ! សមត្ថកិច្ចវៀតណាមទើបតែបានបង្ក្រាបទីតាំងផលិតកាហ្វេក្លែងក្លាយដ៏ធំមួយ ដែលប្រើប្រាស់ល្បិចកលយករុក្ខជាតិ និងសារធាតុគីមីមកកែច្នៃបន្លំធ្វើជាកាហ្វេសញ្ញា “T.T.”។ អ្វីដែលគួរឱ្យព្រួយបារម្ភបំផុតនោះគឺ សារធាតុផ្សំដែលរកឃើញនៅក្នុងផលិតផលក្លែងក្លាយទាំងនេះ ត្រូវបានអ្នកជំនាញព្រមានថា អាចផ្ទុកសារធាតុពុលកម្រិតធ្ងន់ និងបង្កជាជំងឺមហារីកយ៉ាងសាហាវដល់អ្នកបរិភោ។
.jpg)
យោងតាមការចុះផ្សាយជាផ្លូវការ នាយកដ្ឋាននគរបាលសេដ្ឋកិច្ចខេត្ត Gia Lai នៃប្រទេសវៀតណាម បានសម្រេចចោទប្រកាន់ជាផ្លូវការលើជនសង្ស័យឈ្មោះ Nguyen Thanh Quang ពីបទ «ផលិត និងជួញដូរទំនិញក្លែងក្លាយដែលជាអាហារ» តាមក្រមព្រហ្មទណ្ឌវៀតណាម។ នៅក្នុងប្រតិបត្តិការចុះបង្ក្រាបទីតាំងអាជីវកម្មមួយកន្លែងនៅក្នុងសង្កាត់ Hoi Phu ក្រុង Pleiku សមត្ថកិច្ចបានរកឃើញ និងដកហូតវត្ថុតាងជាកាហ្វេសិប្បនិម្មិតសម្រេចបានចំនួន ២០២ គីឡូក្រាម រួមទាំងគ្រឿងចក្រ និងឧបករណ៍ផលិតកម្មជាច្រើនទៀត។.jpg)
តាមលទ្ធផលនៃការស៊ើបអង្កេត និងការធ្វើកោសល្យវិច័យបានទម្លាយថា កាហ្វេក្លែងក្លាយទាំង ២០២ គីឡូក្រាមនេះ មិនមានផ្ទុកគ្រាប់កាហ្វេពិតប្រាកដនោះឡើយ។ ជនសង្ស័យបានយកសណ្តែកសៀងទៅលីងរហូតដល់ខ្លោចខ្លាំង ដើម្បីយកពណ៌ខ្មៅ និងរសជាតិល្វីង រួចលាយបញ្ចូលគ្នាជាមួយសារធាតុបន្ថែម និងរសជាតិគីមីសិប្បនិម្មិតដើម្បីបន្លំភ្នែកអ្នកប្រើប្រាស់។ យោងតាមអ្នកជំនាញវេជ្ជសាស្ត្រ ការបរិភោគសណ្តែកសៀងលីងខ្លោចខ្លាំងបែបនេះ នឹងបង្កើតឱ្យមានសារធាតុគីមីម្យ៉ាងឈ្មោះថា Acrylamide ដែលជាភ្នាក់ងារបង្កឱ្យមានជំងឺមហារីកក្រពះ និងពោះវៀន ព្រមទាំងប្រឈមនឹងការខូចថ្លើម និងតម្រងនោមដោយសារជាតិគីមីឧស្សាហកម្មគ្មានប្រភពច្បាស់លាស់។
ជារួមមក ករណីបង្ក្រាបកាហ្វេក្លែងក្លាយនេះ គឺជាការដាស់តឿនយ៉ាងរន្ធត់មួយដល់អ្នករស់នៅតំបន់អាស៊ីអាគ្នេយ៍ ឱ្យបង្កើនការប្រុងប្រយ័ត្នខ្ពស់ចំពោះផលិតផលចំណីអាហារដែលមានតម្លៃថោកខុសប្រក្រតី ឬគ្មានប្រភពច្បាស់លាស់។ បច្ចុប្បន្ន ជនល្មើសត្រូវបានសមត្ថកិច្ចវៀតណាមហាមឃាត់មិនឱ្យចាកចេញពីលំនៅឋាន ដើម្បីរង់ចាំការចាត់វិធានការតាមផ្លូវច្បាប់យ៉ាងតឹងរឹងបំផុត ខណៈដែលការស៊ើបអង្កេតកំពុងបន្តធ្វើឡើងដើម្បីស្វែងរកប្រភពចែកចាយបន្ត៕
