បទខំផលិតក្លាយជា Trend មិនសមរម្យ ដួង វីរៈសិទ្ធ ចេញមកនិយាយបែបនេះ

ដួង វីរៈសិទ្ធ តារាចម្រៀងដែលកម្រនឹងមានរឿងអាស្រូវនៅក្នុងសង្គមសិល្បៈបាននិយាយចេញជាលើកដំបូងក្រោយពីបទរបស់ខ្លួនត្រូវបានអ្នកលេងបណ្តាញសង្គមមួយចំនួនយកទៅដាក់ធ្វើជា Trend ក្នុងរឿងមិនសមរម្យ។

ធ្លាប់តែដៀលដាមដល់ប្រទេសជិតខាងទាក់ទងនឹងការរកស៊ីផ្លូវភេទប៉ុន្តែថ្មីៗនេះអ្នកលេងទិកតុកមួយចំនួនបែរជានាំគ្នាបង្កើតទៅ Trend ក្នុងរឿងមិនសមរម្យដោយផ្សារភ្ជាប់ទៅនឹងបទចម្រៀងរបស់ ដួង វីរៈសិទ្ធិ។ ឃើញមានការផុសផុលក្នុងរឿងមិនគួរឱ្យកើតមាន ដួង វីរៈសិទ្ធ បានចេញមកបង្ហោះថា «អ្នកស្រែចាំអូន បទរបស់ខ្ញុំបទភ្លេងពីរោះអត្ថន័យកំសត់ សូមបងប្អូននិងហ្វេនទាំងអស់គ្នាស្តាប់ដោយគិតរឿងល្អៗ»។

តាមរយៈសារនេះ តារាចម្រៀងរូបនេះបានរំឭកដល់អ្នកស្តាប់ឱ្យយកចិត្តទុកដាក់លើអត្ថន័យដើមរបស់បទចម្រៀង និងស្តាប់ដោយផ្តោតលើមនោសញ្ចេតនាដែលអ្នកនិពន្ធចង់បង្ហាញ ជាជាងយកទៅប្រើប្រាស់ក្នុងបរិបទដែលអាចធ្វើឱ្យប៉ះពាល់ដល់អត្ថន័យ ឬរូបភាពរបស់ស្នាដៃ។

តារាចម្រៀងសំឡេងពីរោះ ដួង វីរៈសិទ្ធិបានបញ្ជាក់ទៀតថា អ្នកស្រែចាំអូន ក៏ជាបទភ្លេង original ដែលលោកនិពន្ធផងដែរដែលមានការនិពន្ធទំនុកច្រៀង លោក អ៊ុង បញ្ញាវ័ន្ត សម្រួលតន្ត្រីដោយលោកផ្ទាល់និងកូតទ្រដោយលោក ឌៀប សិទ្ធសុធា។

ការលើកឡើងរបស់ ដួង វីរៈសិទ្ធ ត្រូវបានគេជឿថាឆ្លើយតបដោយប្រយោលចំពោះបទចម្រៀងរបស់លោកដែលបានក្លាយជា Trend ដែលចាត់ទុកថាមិនសមរម្យ។ ការបង្ហោះវីដេអូនៅលើទិកតុកអ្នកលេងទាំងនោះបានប្រើពាក្យថា «ហៅវៃ» និងបង្ហាញសកម្មភាពហាក់ដូចជាមានទំនោរទៅរឿងផ្លូវភេទ៕