អែនជែលឡា បកស្រាយពីមូលហេតុដែលឈានចូលអាជីពសិល្បៈម្តងទៀត

ឃ្លាតឆ្ងាយពីអាជីពសិល្បៈជាច្រើនឆ្នាំ អែនជែលឡា បានបង្ហាញពីមូលហេតុនៃការឈប់សម្រាករបស់នាងដោយមានឪពុករបស់ខ្លួនផ្តល់ចម្លើយដោយស្មោះត្រង់មកកាន់អ្នកគាំទ្រ។ ជាមួយគ្នានេះការវិលត្រឡប់មកកាន់វិថីសិល្បៈម្តងទៀត អែនជែលឡា បានបង្ហាញពីហេតុផលជាមួយនឹងការតាំងចិត្តយ៉ាងមុតមាំដោយមិនមែនជា អែនជែលឡា កាលពី១០ឆ្នាំមុនឡើយ។

«បង្ខំចិត្តបែក» «ពេលវេលាមិនស័ក្តិសម» «ពេលជួបពេលឃ្លាតពិបាកដូចគ្នា» «ស្មោះធ្វើអ្វីបើគង់តែបែកគ្នា» សុទ្ធសឹងតែជាបទដ៏ល្បីល្បាញរបស់តារាចម្រៀង អែនជែលឡា ដែលជាប្អូនស្រីបង្កើតរបស់លោក ណាំ ប៉ុណ្ណារ័ត្ន។ ក្នុងពេលដែលកំពុងមានសន្ទុះប្រជាប្រិយភាព អែនជែលឡា ដែលមានឈ្មោះពិតថា ណាំ វរលាភ បានបាត់មុខពីអាជីពសិល្បៈតែម្តងនិងសម្រេចចិត្តរៀបការក្នុងឆ្នាំ២០២៤។

នាពេលថ្មីៗនេះ អែនជែលឡា ក៏បានបង្ហោះវីដេអូជាមួយឪពុកនិងបញ្ជាក់ពីមូលហេតុនៃការផ្អាកពីអាជីពសិល្បៈដោយសារតែមនុស្សមួយចំនួនមានគំនិតអគតិ មិនសូវផ្តល់តម្លៃមកកាន់អ្នកសិល្បៈជាពិសេសកូនរបស់គាត់គឺជាកូនស្រីទៅទៀត ដូច្នេះទើបជំរុញឱ្យកូនស្រីក្រេបយកចំណេះវិជ្ជា សិក្សាឱ្យបានខ្ពស់សិន។ ក្រោយមក អែនជែលឡា ក៏បានបង្ហោះវីដេអូដែលបញ្ជាក់ពីហេតុផលរបស់ខ្លួនក្នុងការឈានចូលអាជីពសិល្បៈម្តងទៀត ហើយក្នុងរយៈពេល១០ឆ្នាំមកនេះនាងបានធ្វើអ្វីខ្លះ។

តារាចម្រៀងរូបនេះថា អ្វីដែលនាងចង់ចែករំលែកជាមួយទស្សនិកជនគឺនាងបានបញ្ចប់សាកលវិទ្យាល័យតាមការចង់បានរបស់គ្រួសារ មានការងារធ្វើក្រៅពីអាជីពសិល្បៈ ឈានជើងចូលវិស័យការងារឯកជន និងបានកសាងអាជីពក្នុងវិស័យ អចលនទ្រព្យអស់រយៈពេលជាង៨ឆ្នាំ។

ក្នុងរយៈពេលជាច្រើនឆ្នាំនាងបានឆ្លងកាត់បទពិសោធន៍ជាច្រើនដែលធ្វើឱ្យនាងកាន់តែធំជាងមុន អាចមើលថែខ្លួនឯងបាន មានការសម្រេចចិត្តខ្លួនឯងនិងមានភាពឯករាជ្យ ដូច្នេះនៅពេលនាងចង់ប្រឡូកក្នុងអាជីពម្តងទៀតគឺមានភាពងាយស្រួល។ ដូច្នេះវាជាបទពិសោធន៍មួយថាក្តីស្រមៃរបស់នាងនៅតែបន្តគ្រាន់តែរង់ចាំពេលវេលាមកដល់ប៉ុណ្ណោះ។



អែនជែលឡា ថាអ្វីដែលនាងធ្វើក៏ចង់បញ្ជាក់ទៅកាន់សង្គម ក្រៅពីការច្រៀងគឺនាងអាចធ្វើអ្វីផ្សេងទៀត មានទាំងចំណេះដឹង ការគិតពិចារណាបានច្រើន ដោយមិនចង់កំណត់ខ្លួនឯងថា ជា «តារាចម្រៀងម្នាក់» តែមួយមុខនោះទេ៕