ដេត ស្រីនាឌ លើកស្ទួយវប្បធម៌ខ្មែរបង្ហាញជាតួអង្គ «យាយសុខ» ដែលថៃព្យាយាមដណ្តើម

ទោះបីជាបញ្ចប់ការប្រកួតបវរកញ្ញាឬលែងឈរនៅលើឆានអន្តរជាតិតំណាងប្រទេសក្តីប៉ុន្តែ ដេត ស្រីនាឌ Miss Charm Cambodia 2025 ត្រូវបានទស្សនិកជនមើលឃើញថានាងសស្រាក់សស្រាំងផ្សព្វផ្សាយពីវប្បធម៌ខ្មែរមិនដាច់។ ជាក់ស្តែងស្របពេលអ្នកជិតខាងចង់ដណ្តើម «យាយសុខ» មកធ្វើជារបស់ខ្លួន ស្រីនាឌ បានតុបតែងខ្លួនបែបបុរាណដែលបំផុសគំនិតពីដូនតារបស់ខ្លួន។

កម្ពុជាមានភ័ស្តុតាងនិងឯកសារច្បាប់ពីអន្តរជាតិគ្រប់គ្រាន់ ១០០% ក្នុងការបញ្ជាក់ថា ទាំងប្រវត្តិនៃវប្បធម៌ «ស្បៃពានា» និងទាំងផ្ទាំងរូបភាពប្រវត្តិសាស្ត្ររបស់ «លោកយាយសុខ» គឺសុទ្ធតែជារបស់ខ្មែរ និងជនជាតិខ្មែរ។ ទោះបីជាយ៉ាងនេះក្តីភាគីថៃមិនព្រមទទួលស្គាល់ការពិតបង្កើតរឿងប្រឌិតបោកប្រាស់ចិត្តខ្លួនឯងថា «យាយសុខ» គឺជាជនជាតិថៃនិងដណ្តើមធ្វើជាកម្មសិទ្ធិទៅវិញ។

នៅយប់ថ្ងៃទី២៣ ខែកញ្ញា ដេត ស្រីនាឌ បានបង្ហោះវីដេអូមួយជាមួយនឹងខ្លឹមសារថា «ឆ្លងភពទៅសម័យលោកយាយលួត សុខ ព្រោះ ខ្មែរជាម្ចាស់នៃវប្បធម៌ និង អរិយធម៌ ដ៏រុងរឿងមួយនេះ ដូច្នេះយើងមិនខ្លាចនឹងបង្ហាញទេ ព្រោះចោរជិតខាងខ្លះ ចូលចិត្តឈ្លានពានណាស់ បន្ទាប់មកវាដើរស្រែកដាក់គេ ថាគេជាចោរ»។

វីដេអូរបស់ Miss Charm Cambodia 2025 បានធ្វើឱ្យអ្នកគាំទ្រពេញចិត្តយ៉ាងខ្លាំងខណៈដែលអ្នកលេងបណ្តាញសង្គមថៃឆេះឆួលដល់ចុងច្រមុះបានចូលមកខម្មិនយ៉ាងក្តៅគគុកនៅពីក្រោមការបង្ហោះរបស់បវរកញ្ញារូបនេះ។
មែនទែនទៅ ជារឿយៗ ដេត ស្រីនាឌ ជាបវរកញ្ញាខ្មែរម្នាក់ដែលសស្រាក់សស្រាំងបង្ហាញពីវប្បធម៌ខ្មែរជាច្រើនជំនាន់ផ្សេងៗគ្នាទាំងការរាំរបាំព្រះរាជទ្រព្យ និងឈុតជាអប្សរាខ្មែរយ៉ាងស្រស់ស្អាតដែលប្រទេសខ្លះកើតចិត្តចង់បានតជំនាន់តកូនតចៅ។

ដេត ស្រីនាឌ បានធ្វើឱ្យមហាជនចាប់អារម្មណ៍កាន់តែខ្លាំងបន្ទាប់ពីបានជាប់ចំណាត់ថ្នាក់ Top 20 Miss Charm 2025 ដែលនាងជាអ្នកបើកទ្វារកម្ពុជាចូល TOP លើកដំបូងសម្រាប់ការប្រកួតនេះ។ លើសពីនេះ ដេត ស្រីនាឌ បានធ្វើវីដេអូ Trend របស់តារាចម្រៀងប៉ុប ផឿង មីជី ដោយបញ្ជូលនូវវប្បធម៌ខ្មែរនិងវៀតណាមយ៉ាងស្រស់ស្អាត៕